David Toews - Truhoatich

Teewse Doft haft nich bloos Musitj em Blood - uck siene Femilje es ahm schienboa seea dicht aum Hoat! Hab mie afens daut Leet/Video "Pape, Wua Wiescht Du" aunjeseene: een bet Country, een bet Heimatklänge, een bet David ohne Goliath... Hee sinjt soo, dochwoll wiels hee weet, woo et es, wan eena sich bangt... Wudd mie seea jern mol dee gaunze CD von disem Doft aunhorche! Dee CD "Truhoatich" es noch frescha aus fresche Tweebak en woat aum 8. Juli enne King Road MB Tjoatj (Abbotsford, Kanada) veajestalt. Schod, daut Kanada soo wie auf von Dietschlaunt es ;)

Daut Foto hab etj von Doft Teews siene Facebook-Sied... Sien Tjint?

Plautdietsch FRIND 2011

Daut FRIND-Heft Numma 24 fe 2011 es foadich en unjaweajes no dee Mensche, woone daut bestalt habe ooda Mettjlieda em Vereen Plautdietsch-Freunde e.V. send! Horst Moates, dee nia Chefredakteur, haft eene wundaboare Oabeit jemoakt en butajeweenlich goode Sache tom Lese en Seene toopjestalt...

Dee Knoakes, dee wie send

Woo lang lidje se doa aul?
Es noch waut draun?
Etj kaun se seene
Oba bloos mett Oge hinja schwoate Wenj
Etj kaun se ritje
Oba nich mett miene Nes
En wan mett miene
Dan nich wieda
Aus etj mie selwst ritje kaun
Send se noch doa, woo se were?
Send se doot en witt aus oppe Bilda?
Wudd etj Angst habe, wan etj se seene wudd?
Etj we soo dicht
Soo dicht!
Etj kaum emma noda
Etj spead se
Etj kunn se aul meist aunschere
En dan were's fot -
Etj sched se niemols aun en
Hab se bett vondoag nich jeseene
Framd jeblewe send se mie en
Emma framda woare se
Etj bang mie
Etj hiel en bang mie emma dolla -

Dee Knoakes, dee wie send
Dee moake ons
Dee moake ons stoatj en
Dee moake ons Angst
Dee schlope hinja schmocke Oge
En droage onse wetje Hut
Nich vel aundasch en meist soo
Aus lota uck ons Os

* * *