Uck wan see boolt 70 woat: Hia litjent noch nuscht no oolt - nich Tatjana Klassner en uck nich eare Sproak! Aul wada haud se toopjekroagt tom... jo vleicht uck een bet tom Jeburtsdach feire, oba noch vel meea, tom Lost en Moot moake, mette plautdietsche Sproak to experimentiere. En daut wie daut, waut wie ons soo utdentje, nich vestoppe! Etj frejd mie, daut etj bie dise Rund doabie senne durw en staund en horchd, waut wie aula soo to saje en to sinje haude.
Daut we jistre (aum 7.8.) een butajeweenlija Nomeddach! Bestemmt woare Tatjana en ea Maun Josef boolt een Video von disem Dach habe.
Een Dach verhea haud etj von mienem Brooda Jascha em Femilje-Chat een kortet Selfie-Video jetjreaje mett eenem Leet, daut aus eene Auntwot opp mien Jedicht ("Waut wie brucke") we, daut etj noch een Dach eea (aum 6.8.) fe Tatjana earen Nomeddach jeschrewe haud (see Blog-Post "Weiter"). Soo es daut: Wan wie mett eenaunda em Kontakt send en eenaunda mettdeele, waut wie dentje, dan bliew wie jung em Kopp - en vleicht soogoa uck em Hoat.
