Sonntag, 28. Oktober 2007

Hezhgrul, Schlorre, Balalaika







Kruft 2007. Jieda Joa em Oktooba dee latsta Sinowent: Dan es dee plautdietsche Welt to eenem kulturellen Trafe enne Vulkanhalle von Kruft enjelodt. Dise Staut licht irjentwoo tweschen Neuwied en Koblenz, nich wiet von Bonn, woo dee aktive en kreative Tina Wedel wohnt.

Tina haft disen Plautdietscha Nomeddach (jistre aum 27.10.07) nu aul tom dredden Mol organiset -- toop mett eare Bonna Grupp en en Kooperatioon mette Plautdietsch-Freunde e.V. Uck ditmol gauf daut wada een entressauntet en buntet Prograum mett vel Musitj, Sketche, Leeda en Jedichta. Uck "ooltmoodsche" mennische Tjleeda worde wada presentet, niee Betja, CDs en Bilda were to tjeepe, en fresche Tweebak fehlde nich. Hia kunn soo maunch eena sich mol wada soo rechtich "tussich" feele...

Oppe Fotos (von bowe no unje): Daut niee Bok von Tatjana Klassner en Heinrich Siemens utem Tweeback-Verlag, Tina Wedel mett Mikro en mett Frind oppe Behn, dee Schlorre-Grupp biem Daunze, twee oole Frind biem Musizere, Hezhgrul Peeta Brun halpt ons dentje, daut wie Mensche send, Hannah Siemens schmenjt fresche Tweebak, woone Marina Jaunze noch vegone Nacht jebakt haud...

1 Kommentar:

Anonym hat gesagt…

...aus etj mett Anne unjaweajes no Kruft we, we wie grods verhea bie miene Ellre en Siegburg. Mama sed, scheen, Peeta, daut du Papa noch eenmol jeseene hast. Kaun senne, daut hee boolt stoawe woat. Papa haft aul vele Joare Parkinson en licht paralyset em Bad. Kaun aul lang nuscht meea saje... Unjaweajes enne Meschien sed etj to Anne, daut etj uck spea, daut hee boolt stoawe woat. Oppem Plautdietschen Nomeddach troff etj Heinrich en Harry Siemens ea Voda Nikolai. Wie vetalde ons ewa Papa, Jesuntheit, daut Lewe en ewa mien Jedicht "Wea weet!?". Siemens kaun daut utwandich en wull daut jern oppsaje... Vondoag, 11 Doag lota, es mien Papa jestorwe...