Tweebak

Plautdietsch FRIND 2011

2011-12-22T11:03:00.002+01:00

Daut FRIND-Heft Numma 24 fe 2011 es foadich en unjaweajes no dee Mensche, woone daut bestalt habe ooda Mettjlieda em Vereen Plautdietsch-Freunde e.V. send! Horst Moates, dee nia Chefredakteur, haft eene wundaboare Oabeit jemoakt en butajeweenlich goode Sache tom Lese en Seene toopjestalt...

Dee Knoakes, dee wie send

2011-09-21T08:06:00.012+02:00

Woo lang lidje se doa aul?
Es noch waut draun?
Etj kaun se seene
Oba bloos mett Oge hinja schwoate Wenj
Etj kaun se ritje
Oba nich mett miene Nes
En wan mett miene
Dan nich wieda
Aus etj mie selwst ritje kaun
Send se noch doa, woo se were?
Send se doot en witt aus oppe Bilda?
Wudd etj Angst habe, wan etj se seene wudd?
Etj we soo dicht
Soo dicht!
Etj kaum emma noda
Etj spead se
Etj kunn se aul meist aunschere
En dan were's fot -
Etj sched se niemols aun en
Hab se bett vondoag nich jeseene
Framd jeblewe send se mie en
Emma framda woare se
Etj bang mie
Etj hiel en bang mie emma dolla -

Dee Knoakes, dee wie send
Dee moake ons
Dee moake ons stoatj en
Dee moake ons Angst
Dee schlope hinja schmocke Oge
En droage onse wetje Hut
Nich vel aundasch en meist soo
Aus lota uck ons Os

* * *

Plake

2011-09-13T08:55:00.008+02:00

Hia oppem Foto es Jack Thiessen ut Winnipeg mett Hillary Clinton - dit Foto haud hee mie aul ver vele Joare jeschetjt. Dise Jeschicht hia unje vondoag:

Etj wea em Läwe noch niemols nijch een groota Koffedrintja, oba nu sett etj aul tien Joah jieda Wäatj eascht mett Kauspasch Hein, dann mett Henry Kasper toop enn drintj enn Steinbach Koffe. Mett ahm kaun eena räde, soo’s eenem de Schnowel jewosse ess; vondoag vetald etj ahm disse Jeschijcht, enn wiels hee mie nijch vemohne deed, woa etj disse Jeschijcht uck mol wieda vetalle:

Soo’s dit:

Etj hab disse Jeschijcht aul verhäa vetalt, oba donn haud etj noch Utsejcht Prädja too woare, enn dann jeheat sijch daut soo, daut eena siene Sproak utstraumt, enn nijch rejchttoo räd, sonda omme Atj. Oba donn läwd Prädja John R. Friesen noch, dee emma soo deed auls wann wie dijchste Frind weare. Daut jletjt ahm uck, wiels auls hee Prädja enn Oostberlin enne Zäwentjajoahre wea, jefoll mie sien Moot doa manke Kommuniste Rosmack too hoole soo goot, daut etj ahm enn siene Jemeend tien Dusend Dohla schetjt (eene groote Somm fee en Puptjebua), enn donn meend hee, etj wea een gooda Tjrist, enn vetald daut uck aulewäje.

Oba donn schreef etj eene kritische Rezension fe den Boten, too dee de leewa Gott “Amen” säd, enn von donn aun durf de Bote niemols nijch meea Artitjel von mie dretje, “niemols meea, doaf Jack Thieβen em Boten too Wuat kohme!” soo bestemmd dis Präda, dee Scherniesel John R. , dee Bote Board Diretjta, Amen! Daut nannd John R., dee M. C. C. Boss, “nijch racial profiling”, sonda “faith profiling!”

Etj weet nijch, auls John R. Friesen doawäjen platzlijch stoawe muβt, oba etj jleew de leewa Gott, dee nijch mett sijch spoβe lat, uck wann Prädjasch daut foaken proowe, kunn sowaut doohne, - etj meen dem Johaun den Gorjel aufdreie -, wiels Hee aulnoch opp miene Sied ess. Schietstrempe enn Veloagenheit habe biem himmlischen Voda weinja Ruhm auls enne Tjoatje.

Oba tridj noh miene Jeschijcht, dee sijch soo vetalle lat, wiels etj doch nijch Prädja word, weens nijch bett nutoo, enn nijch vonne John R. Friesen Sort.

Auls mien Voda Joahrelang met twee Menniste ut Paraguay, een Dertjze, enn een Niefeld em Curtis Hotel enn Nuad Kildoona opp Plautdietsch Koffe drunk, ooda uck bie Dertjzes Terera Tee drunk (Terera Tee schmatjt noh gaulstajet Hacksel, oba eena jewahnt sijch doaraun, woat jesajcht) dann räde see, soo’s Nippaenja unja sijch vetalle.

Niefeld wea zäwentijch Joah oolt, Dertjze fiewenzäwentijch, enn ons Voda tachentijch. Enn kratjt soo auls Frulied, vetalle see sijch dann äwa ähre Jesundheit, enn waut ahn schode deit ooda uck nijch, oba noch woat.

Niefeld säd bie ahm wea noch soo meea aules enn Ordninj, oba maunjchmol diead ahm daut, wann hee Klock säwen oppstund, doch soo ruhm eene haulwe Stund bett hee gaunz Wota lohte kunn. Daut muak ahm Sorje.

“Wota lohte, ess bie mie tjeen Probleem,” säd Dertjze, “oba wann etj Klock acht oppstoh, dieat daut maunjchmol doch meea auls eene haulwe Stund bett etj mett mien Stoohlgang foadijch sie; daut well nijch meea soo jlei rutsche, auls frähjoah,” säd hee.

Voda saut enn schmustad, enn drunk Koffe, aul de tweede Taus.

Enn donn fruage Niefeld enn Dertjze toop, “Na, enn du, Thiesse, Du jniesascht een bät, enn Du best je nu aul tachentijch, woo steiht’et mett Die?” ”Uch,” sajcht Voda, “Klock säwen strull etj soo’s een Kunta, enn Klock acht schnerz etj soo’s een Gaunta enne baste Tiede.”

“Oba waut ess dann mett Die loos, woaromm jniesascht Du, enn lachst?”

“Etj woa eascht Klock näjen wacka!”

* * *

Jack Thiessen schetjd mie dise Jeschicht (Originaltitel: Ella woare) vondoag zemorjens via Email. Siene Schriewwies leet etj soo. Hee schreef unje noch doatoo: "Voda vetald deeselwje Jeschijcht auls hee fiewentachentijch word, enn uck noch auls hee näjentijch wea. Auls hee donn sass-enn-näjentijch word, wea de Spoβ too Enj, enn hee schleep lenja auls bett Klock näjen."

Schriew dien Lewe

2011-09-11T12:59:00.008+02:00

Vondoag en jistre en ehjistre troffe sich en Oerlinghausen mol wada plautdietsche Lied, woone schriewe en noch meea en beta schriewe welle. Agnes Goosse en dee Plautdietsch-Frind haude to disem Schriewa-Seminoa enjelodt en vele Autore kaume, lause, schreewe, diskutede en - leete sich uck daut Ete scheen schmatje! Schlieslich gauf daut ditmol waut gaunz Besondret to feire: Tatjana Klassner (bowe oppem Bilt), onse Anna-Germansche, es aun disem Sinowent 60 jeworde!

Aulet Baste aun eene butajeweenlich goode plautdietsche Fru en Kultua-Aktivistsche mank ons Plautdietsche! Mucht se toop mett earem Joosef jesunt en jeseajent bliewe!

Bowe oppem Bilt schentj Tatjana mie eene von eare CDs. Unje send dee Seminoa-Deelnehma biem Lese en Kritisere to seene - en uck biem Sinje: Oppenowent word enne Kamin-Stow jemietlich jenobat, jejete, jedrunke, jesunge... Hia sinje Tina Wedel en Ella Deppe opp eare wundaboare Wies...

Obraum en Natascha

2011-07-18T02:39:00.005+02:00

Morjes Natascha!
Morjes mien Jung! Waut deist du grods?
Oh... Etj doo seea vel oabeide! Seea vel schaufe! Etj mott noch 100 Sied schriewe!
Wow! See mol aun! Du hast doa oppem Computer oba bloos Bilda!
Oh, dee kome emma von gaunz auleen...
Daut es bie mie uck soo! Etj wull grods uck 100 Sied schriewe en dan we doa opp eenmol een Bilt von die!
Von mie? Een Bilt?
Jo, bloos von die. Von diene Tjleeda we nuscht to seene...
Etj sie hia grods bie Facebook en well daut lasche. Fotmoake. Mama haft daut bie Facebook nennjestalt.
Jo, daut's wertjlich seet, soo seet! Du best doa dochwoll escht bloos 1 Joa oolt, soo tjlien! Oba dien Kopp we aul soo groot aus vondoag!

Hia spele se

2011-06-12T23:27:00.010+02:00

Vondoag we daut dan mol wada soo wiet, aul tom feften Mol, emma Pinjstre: daut Foobaul-Turnier en Preußisch Oldendorf. Dee Orenburja Darpa wulle weete, wea daut baste dem Baul scheete kaun en ditmol vespeld aum Enj Chortiza jeajen Kitschkas!

Opp dem tweedlatzten Bilt von unje es Tjretjasch Eedi (Eduard Kröker) to seene. Hee es eena vonne Organisatoren en haft vel Grunt tom Lache: Nich bloos dee Sonn schiend vondoag so scheen, uck dee Mensche kaume hupewies en haude vel Spos aulatoop! Eedi en siene Frind ut Preußisch Oldendorf habe eene wertjlich goode Sach oppe Been jestalt! Tom Deel send dee uck hia oppe Fotos to seene: Olga en Valera Friesen, Olga en Seroga Buller, Peeta Thiessen, Wanja Tjretja en Schmette Natasch. Bestemmt send doa noch aundre... Meist vejete: Worotar Willi Olfert, woona nich jenau wusst, auf hee vondoag fe Kitschkas ooda Chortiza spelt ;)

Hia oppem Video es Chortiza doabie, sich fe daut Finale to kwalifizere...

See uck Footbaul 2011 (opp Hochdietsch).

Himmel

2011-05-15T16:31:00.004+02:00

Schlut mie op en
Schlut mie too
Saj mie eent fe aulemol
Nemm
Hia es dien tweeda Schoo
Tratj mie ut en
Tratj mie aun
Saj mie eent fe aulemol
Nemm
Hia es dien Schoo, dien Deel
Du hast die lang jebangt
Hia best du nu
Woo dien Hoat die habe wull
Tus
Bie Tjarpa, Jeist en Seel
Saj mie, bitte saj
Saj mie eent fe aulemol
Nemm
Hia es dien tweeda Schoo
Tratj dem aun en go
Tratj die ut en bliew
Etj schlut ons op
Etj schlut ons too
Etj doo daut soo
Wiels tus bie mie es
Tus bie die

* * *

Footbaul Turnier 2011

2011-05-12T14:48:00.000+02:00

Dee Menniste en Dietschlaunt driewe Sport. Uck Footbaul - en haulf Orenburch es doabie! Wea uck noch doabie senne well, selwst spele ooda bloos tjitje ooda eenfach bloos Schaschlik ete, dee sull be eenfach mol opp dit Info-Blaut hia klicke: Jenau omm een Moonat es daut wada soowiet: Enne Hauptschule von Preußisch Oldendorf woare dee junge Lied schweete en rane aus dee Weltmeista. 12 Gruppe send doabie, ut 12 veschiedne plautdietsche Darpa en Russlaunt! Soowaut jefft daut bloos en Dietschlaunt ;) En wan noch wea aune Theke biem Drintje-Utdeele halpe well, dee sull sich, soo sajcht daut Info-Plakat, bie Olga Friesen malde, eare Numma steit doa uck. Na dan well'we mol hope, daut dee Sonn schient...

Plattdeutsch-Fußballturnier 2011
12. Juni 2011, 13.00 - 21.00 Uhr
Hauptschule, Offelter Weg 21
32361 Preußisch Oldendorf

Na? Niescherich jeworde? Hia send Bilda en Infos vom Darp Nr. Sewen vom Turnier 2009!

Tatjana Klassner

2011-04-03T17:01:00.022+02:00

Jistre we daut 5. Anna-German-Festival mett Tatjana Klassner enne Festhalle von Everswinkel! Hia oppem Bilt es Tatjana dee tweede von linjsch, manke Frulied vonne Grupp mettem Nome Lerche - aum Akkordeon es Obraums Leena. Tina Wedel sung tom Aunfang een poa Leeda von Anna German opp Plautdietsch. Em Grooten en Gaunzen gauf daut vel Musitj, vele Leeda, vele Lied, vele Dommheite en emma wada uck mol waut Ernstet - tom Biespell von Peeta Brun mett sienem Leet Ruschet Saula (see Video gaunz unje).

Tatjana Klassner haft aul donnemol em Altaj vel fe dee plautdietsche Kultua oppe Been en oppe Behn (Bühne) jestalt. Dise Leewesdochta haft ea Lewe lang plautdietsche Sache jesaumelt en jeschrewe en veajestalt. Uck hia en Dietschlaunt haft see tom Jletj doamett nich oppjehet. See lewt en Warendorf en moakt aul vonne 2001 aun jieda Joa en Everswinkel, nich wiet von Münster, een grootet plautdietschet Fast: mol eene Oat Kultua-Tjast, mol dit Anna-German-Festival, emma em Watjsel. Goot, daut ea Maun Josef en uck eare Tjinja Larisa en Aleksej ahr emma wada en soo goot unjastette! Mucht Tatjana noch lang jesunt en kreativ bliewe! Uck Anna German wudd sich be freie ;)

Freie doone sich podawno uck aul dee plautdietsche Lied, woone to dise Veaunstaultinje kome. En daut send nich weinich! En ut gaunz Dietschlaunt! Daut Prograum bie Tatjana es jeweenlich zimlich volljepakt en diet zimlich lang. Oba daut jefft je dan uck Pause, woo eena sich vepuste kaun, waut ete en dritje kaun, Betja en CDs tjeepe kaun, ooda sich dee Konst (Bilda, Skulpture, ...) von veschiedne plautdietsche Tjinstla aunseene kaun. Doa were tom Biespell Woatje von Elena Wiebe ut Ibbenbüren ooda Jakob Wedel ut Schieder-Schwalenberg doabie. Maunch eena haft sich je dan uck waut Scheenet mett nohus jenohme. Nohus jenohme habe dee Lied soo ooda soo emma wada vele entressaunte Bilda en Leeda vonne Behn. Doa bowe oppe Behn es bie Tatjana Klassner emma waut loos!

Oppe Bilda: Linjsch sinjt Dima Niefelt toop mette schmocke Tina Heibrajcht. Enne Medd nobre en striede en schelle en kusse sich Nelli en Obraum Pana en eare Prips-Stow. Besied oppem Bilt sett Hendritj Siemens, dee Chef vonne Plautdietsch-Frind, opp eenem Desch. Opp disem Desch hau hee dee Betja ut sienem Tweeback-Verlag aunjebode, oba nu we dee Klock aul 7 en hee haft aul jepakt - mott noch tridj bett Bonn foare. Daut Bilt rajsch wiest Tolik Ditj aum Betja-Desch vonne Plautdietsch-Frind. En hia unje noch daut Video von Peeta Brun - aus'a Ruschet Saula sung...

Tina Wedel

2011-03-20T22:41:00.012+01:00

Tina Wedel ut Leninpol es ver een poa Doag 60 jeworde! Jistre mok se een grootet Fast, en Kruft, woo se sonst emma earen Plautdietschen Nommedach moakt. Tina, ooda Katharina, sinjt seea jern, schrift Jedichta en steht schratjlich jern ver eenem grooten Publikum. Daut haft see dan uck vel jedone. En doamett uck emma wada dee plautdietsche Sproak en Kultua unjastett. Etj wensch ahr aulet Baste tom Jeburtsdach en noch vele goode Doag en Joare!

Linjsch oppem Bild send Tatjana Klassner en Peeta Brun, dee plautdietscha Kabarettist. Tatjana lodt ditja wada tom Anna-German-Festival enn - aum 2. Aprell en Everswinkel. Gaunz unje oppem Bilt es Hendritj Siemens mett siene Dochta Hannah aum Betjadesch - hee bie dee Betja von sienem Tweeback-Verlag, see bie dee Betja vonne Plautdietsch-Frind. Hannah es 9 Joa en redt mett earem Voda emma Plautdietsch. Hia oppem Bilt es to seene, woo eene Fru ahr waut enne Hoa nennspale well...

Bundesraat för Nedderdüütsch

2011-03-14T18:06:00.006+01:00

Dee Bundesraat för Nedderdüütsch haft eene niee Homepage.

Wea tjemmat sich en Dietschlaunt politisch om dee Sproak-Enteresse vonne Plautdietsche? Von nuscht tjemmt nuscht, saj wie emma. Daut heet: Wan dee plautdietsche Menniste en Dietschlaunt nich selwst lud en dietlich saje, daut jefft ons, daut jefft onse Sproak, onse Sproak es eene mank aundre Sproake en Dietschlaunt/Euroopa, wea saul daut dan sonst saje!? Oba gaunz stell send dee Plautdietsche en Diteschlaunt dan doch nich.

Fe eare Sproak habe sich dee Plautdietsch-Frind je aul aune 1999 aus Plautdietsch-Freunde e.V. organiset. En mett dise Organisatioon schetje dee Plautdietsche en Dietschlaunt twee Delegede nom Bundesrot fe Nadadietsch. Hia woat Sproak-Polititj jemoakt. Hia jeit daut om dee Sproak von aula nadadietsche Mensche en Dietschlaunt, endoont woone Oat Plattdeutsch, Plattdüütsch ooda Plautdietsch dee rede ooda nobre ooda snacke ooda prütte. Hia woare eare Entresse opp nationalem en internationalem Nivoo beredt - uck grods mett dee Lied en Steda, woone Jesatze fe ons Launt en fe onse Bundeslenda moake. Dee Gruntloag fe dee Oabeit von disem Rot es dee Europeische Charta fe Regional- en Mindaheitesproake.

Dis Nadadietsch-Rot, woona sich selwst uck Bundesraat för Nedderdüütsch nant, haft nu siene Homepage aktualiset. Doaweajen kaum etj opp dee Idee, disen Blog-Endroag to moake. En noch waut Entressauntet fe ons Menniste: Dee neachste Settinj vom Bundesrot fe Nadadietsch woat aum selwjen Dach senne, wan dee Plautdietsch-Frind earen Joaresdoaginj habe - aum 24. Septamba 2011 en Detmold - toop mett ons!

.

PlautCast - mett een bet Amalgam

2011-02-19T20:26:00.004+01:00

Emma wada horch etj jern en mett groote Ore dee PlautCast-Sendunge. Aus etj afens dee aktuelle #62 horche deed, vefehd etj mie bie Menut 7:30 een bet, wiels dise goode PlautCast-Lied Vern Niefelt en Ken Sewautstje doa opp eenmol mien Bok Amalgam lowe deede! Oba etj vefehd mie nich bloos - etj freid mie uck. Seea!

:)

Anna German

2011-02-14T00:42:00.004+01:00

Aulet Baste tom Jeburtsdach, Auna! Schod, daut du soo jung jestorwe best... Wudd jern weete, auf du uck jern doabie senne wuddst, wan Tatjana Klassner en eare Frind wada mol dit Anna-German-Festival moake, woont se no die benant habe...

Winta

2011-01-17T19:12:00.001+01:00

Lot loos

2010-12-05T20:36:00.001+01:00

Advent, Advent
Dee beid hia ha Talent
Escht rolle's eenen Baul ut Schnee
Dan boolt Baul twee, Baul dree
Dan bowe nopp ne schmocke Schljapa
En foadich es een framda Papa
Em Jesecht en uck opp aundre Sted
Es freschet jreenet Graus mett Ed
Advent, Advent
Wea looslat, dee jewennt

* * *

Integratioonskurs Plautdietsch

2010-11-28T12:29:00.005+01:00

Di Brandt

2010-11-27T22:21:00.008+01:00

Dise Fru haft daut Schriewe en Dichte em Blood. En bie Di Brandt es uck noch waut aundret benne, waut mie seea jefellt, waut Plautdietschet, wiels see es eene Jaunzes-Dochta (Diana Ruth Janzen). Soo haft dee Brauntsche tom Biespell en earem nieen Bok Walking to Mojacar schmock mett eare en aundre Sproake jespelt - en doabie mol wada vel jesajcht ewa onse Welt, wea wie send, en waut mie mett dem, waut wie habe, doone...

Daut Foto (bowe) hab etj mie bie ecclectica Arts utjelieht. Em Video (unje) last Di Brandt ut earem Bok Now You Care - fe woont see 2004 dem Griffin Poetry Prize tjreech. See es Professasche aune Brandon University mett besondre Oppgowe (Canada Research Chair).

YouTube-Rap von jthiessen3

2010-09-15T11:05:00.009+02:00

Vondoag sach etj, daut jthiessen3 (WEA ES DIT??) sich miene plautdietsche You-Tube-Videos (from4711) auntjitjd. Dan tjitjd etj bie ahm siene Videos nenn en we wundaboa ewarauscht: Dis "Deetch Rap (Low German Rap") es fein jemoakt!!! Wudd jern noch vel vel meea Rap-Leeda opp Plautdietsch horche en seene ;)

Emma wada entressaunt: Wan onse Menniste en Kanada, USA ooda Siedamerika "Dietsch" ("Deetch") saje, dan meene dee jeweenlich Plautdietsch en nich Deutsch...

.

Tapaletiensch

2010-09-11T18:45:00.004+02:00

Vondoag gauf daut enne Festhalle Everswinkel mol wada een gaunz besondret Kultua-Trafe: Tweschen Münster en Warendorf troffe sich Plautdietsche ut gaunz Dietschlaunt en horchde en sache en leete sich scheen gone, waut Tatjana Klassner en eare Grupp aules oppjedescht haud: Een buntet Tapaletiensch-Prograum! Oppe Behn to Gaust were mank vele aundre uck Kabarettist Peeta Brun en uck Jehaun Pana mett siene Forstei-Lied.

.

Jedichta ut Amalgam

2010-09-05T10:26:00.010+02:00

Emma wada mol schriew etj een Jedicht ooda eenfach soo een poa Strotschki. Jeweenlich blifft daut irjentwoo opp eenem Papia en irjenteene Schuwlod lidje. Ooda irjentwoo em Kompjuta. Manchmol stal etj daut uck hia em Internet en eenem von miene Blogs nenn. Hia send een poa plautdietsche Jedichta mett Bilda ut mienem Amalgam-Blog:

Droag mie
Endoont!?
Lot ons nich toch
Psaulm 2009
Hoafst, du doafst
Mank Leem en Leew
Em Stoolgang
Fading Faith
Ries von Belies
En dienem Licht (Ewasatinj)
Sputnik
Mama
Daut witte Licht (Ewasatinj)
1967 - 1997 - 2007
Amazing Grace (Ewasatinj)
ALW
Belach!?
Trone vegone
Emma Isa
Noda Voda
Waut es dit?
Bruck dem Dach (Carpe Diem, Ewasatinj)
Shakespeare sien Sommadach (Soonat 18, Ewasatinj)

En hia es eene List mett een poa Jedichta, woone en miene aundre Blogs to finje send:

Tiet frat Leew (Shakespeare sien Soonat 116)
Dee Droom vom Zockaboom
Wea weet
Russlaunt, Dietschlaunt
Alwda Septamba
Tridj
11+7.... (Von guten Mächten wunderbar geborgen, Ewasatinj)

* * *

Kommuniste?

2010-06-13T16:51:00.014+02:00

Nu aum Weatjen-Enj we etj mol wada toop mett soone Mensche, woone PLATTDEUTSCH rede, oba nich Plautdietsch. Jieda Joa eenmol jefft daut eene Konferenz, woo sich nadadietsche Lied ut Dietschlaunt mett earem wietlefftjen Frintschauft trafe, mett jane Lied, woone lang tridj mol no Amerika utjewaundat were. Dise Düütsch-Amerikaansche Plattdüütschkonferenz es mol jantsied enne USA, mol ditsied en Noddietschlaunt. Ditmol we daut enne Staut Nortorf, meddel en Schleswig-Holstein. Aus etj jistre doa een Gruss vonne Plautdietsch-Frind ewameddeld en uck daut Wot "Mennonite" bruckd, haud etj waut enjebrockt! Doa were een poa hundat Lied, en emma wada, bett lot oppenowent, froch mie wea von dee, woo daut dan soo rajcht es mette Mormoone. Mormoone? Bie dem eschten tjitjd etj noch vewundat en sed, daut wie vonne Mennonite staume, nich vonne Mormoone. Oba aus dan een aundra mie uck wada froch, woo daut "bie junt Mormoone soo rajcht es mette...", en etj docht mie aul, daut uck disa mie fe eenen Mormoon hellt en niescherich we, dan sed etj eenfach: Wie send soone besondre Oat ut Russlaunt. Nich soo rajcht Mormoon, en uck nich soo rajcht Mennist. Oba dise Auntwot holp dochwoll uck nich vel. Fe dee amerikaunsche Low Germans es daut Wot MENNONITE nuscht Framdet. Oba manke Plattdüütschen hia en Dietschlaunt send wie Menniste noch nich gaunz tusich, schient mie soo. Hechste Tiet, daut wie ons een bet foakna trafe.

Oppem Foto: Hia vetal etj mie mett Dr. Annemarie Jensen, woone dise Konferenz en Nortorf seea goot organised en derch daut Prograum fehd. Enne neajentja Joare troff see tom eschten Mol Menniste. Daut we irjentwoo en Mexiko. See hed dee Lied rede en daut kaum ahr dan doch seea bekaunt vea... Annemarie Jensen es eene von dee Plattdüütsche, woone uck dem Jadanke unjastette, daut wie meea voneenaunda weete sulle. Dit Foto haft eare Dochta Dörte jemoakt -- see we mett ahr donnemol mett en Mexiko.

Plattdeutsch in den Medien

2010-05-21T12:54:00.015+02:00

Soo we dee Nome von eene entressaunte Doaging jistre em Tjeisasol vom Haumburchschen Rothus. Etj peschd mie meist enne Betjse, aus etj sach, woo schmock daut doa aula lat, en docht: Goot, daut dee NDR en dee aundre Medien en Noddietschlaunt wada een bet meea dee goode oole Haunse-Sproak brucke -- oba noch vel too toofalich ("kak popalo") en vel to weinich strukturell, soo weens meent dee Bundesrot fe Nadadietsch (BfN).

Hia es meea to lese, wan uck opp hochdietsch:

Medien sollen mehr auf Plattdeutsch berichten (Hamburger Abendblatt)
Forderung nach mehr Plattdeutsch (Die Welt)
Medien sollen mehr auf Plattdeutsch berichten (BILD)

Bowe oppem Foto: Jistre nobad dee dietsch-afrikaunscha Yared Dibaba frintlich mett onsem Hendritj ut Lettlaunt (Heinrich Siemens) - opp Plautdietsch. Dee kaun daut wertjlich! Hee we soogoa aul bie dee Menniste en Paraguay, en Sibirien, en uck en Kanda. Yared Dibaba meend, hee wudd bie Jeleajenheit mol bie dee Plautdietsch-Frind en Detmold to Gaust kome. Dan well'we mol scheen schwoaten Prips mett witte Maltj drintje en ewa onse bunte Welt nobre...

Unje oppem Foto: Daut Rothus von Haumburch en een poa Lied, woone grods benne send: Uwe Hansen (BfN, linjsch) en Marianne Ehlers (uck BfN) nobre mett Antje Blumenthal vom NDR-Landesrunfunkrat Hamburg (2. von linjsch). Hansen en Ehlers habe toop mett Dr. Reinhard Goltz, dem BfN-President, en mett aundre (t. B. Hartmut Cyriacks), dee Medien-Doaginj organiset.

Halp Haiti

2010-01-18T19:26:00.007+01:00

Port-au-Prince, Jaunua 2009. Dee Ed scheddat en ewa 100.000 Mensche motte stoawe. Wea aum Lewe es, vetwiewelt vleicht boolt... Endoont!? Wea halpe well, kaun bede, Jelt spende, ooda selwst hangone en aunpake. Hia send een poa Siede mett Informatioone:

Mennonite Central Committee (MCC)
Spendenkonto en Dietschlaunt:
Mennonitisches Hilfswerk e. V.
Stichwort: Katastrophenfond
Sparkasse Ingolstadt
Konto 36 16
BLZ 721 500 00

Welthungerhilfe
Stichwort: Nothilfe Haiti
Sparkasse KölnBonn
Konto 11 15
BLZ 370 501 98

Aktion Deutschland Hilft
(Bündnis von deutschen Hilfsorganisationen)
Stichwort: Erdbeben Haiti
Bank für Sozialwirtschaft
Konto 10 20 30
BLZ 370 205 00

Diakonie Katastrophenhilfe
Stichwort: Erdbeben Haiti
Postbank Stuttgart
Konto 502 707
BLZ 600 100 70

Caritas international
Stichwort: Erdbeben Haiti
Bank für Sozialwirtschaft Karlsruhe
Konto 202
BLZ 660 205 00

UNICEF
Stichwort: Haiti
Bank für Sozialwirtschaft
Konto 300 000
BLZ 370 205 00

Ärzte ohne Grenzen
Stichwort: Haiti und andere
Bank für Sozialwirtschaft
Konto 97 0 97
BLZ 370 205 00

DRK
Stichwort: Haiti
Bank für Sozialwirtschaft
Konto 41 41 41
BLZ 370 205 00

CARE
Stichwort: Haiti
Sparkasse KölnBonn
Konto 4 40 40
BLZ 370 50 198

Frooe Wienachte en aulet Baste fe 2010

2009-12-26T17:28:00.008+01:00

Vondoag, aum tweeden Wienachtsdach, mok etj mie eenen gooden Cappuccino en laus mol wada Natalie earen Blog... Dise Mejal, miene kalifornische Nicht, we ditjao em Feebua toop mette Plautdietsch-Frind en Belies en schreef uck en earem Blog vel doarewa -- daut meschte opp Enjlisch. Aus etj daut nochmol laus, en waut se em Somma en em Hoafst soo deed en schreef, funk etj doa mank uck dise scheene Wed ewa eare Ellre ea eare Sproak:

"They consider it a useless dialect, yet they fall back into like an old habit. I don't care how useless it is, that language is sweetly familiar to me. The sound of it spoken makes me feel warm and at ease, because that is how my parents feel when they speak like that." Natalie Wiens, "My parents", 25. August 2009

Ditjoa send Natalie en eare Ellre offizielle Ewasata fe daut Amerikaunsche Jerecht jeworde -- dee bruckde Plautdietsch-Ewasata. Dochwoll jefft daut uck enne USA soone "Menniste" aus Alex Wiens. Schod. Om soo beta, daut et doa uck soone aus Natalie jefft!

Bowe oppem Foto huppst mien Brooda Rudi mett siene Fru Ani en eare Dajchta Natalie, Melissa, Elona en Jessica (von linjsch). Dit schmocke Bilt hab etj mie ut Natalie earem Blog jetjlamt ;)

Leeda kome, Leeda gone

2009-12-20T19:05:00.006+01:00

Vondoag es dee veda Advent. Boolt es Wienachte. Waut's loos en dienem Hoat? Bloat doa irjentwea? Wacht doa irjentwaut? Naut, kolt? Speasch et kome, dit woame Licht, dee stelle oole Wies von morje, woone tweschen Dach en Nacht vestoppe wullst, nich hoole kunnst... Schlut too dee Oge, horch, hia es dis Toon, dis Droom, dee Trub, dee fe ons beid jespelt woat...

10 Joa Vereen fe Plautdietsch

2009-11-14T16:55:00.002+01:00

Vondoag jenau ver 10 Joa haud etj bie mie tus een poa Frind enjelodt en toop deed wie dee Satzung fe eene niee Organisatioon beschlute: Dit we dee Aunfang von Plautdietsch-Freunde e.V. en dise Lied were doabie: Auna en Peeta Wiens (Oerlinghausen), Lilia en Peeta Pana (Marsberg), Jascha Wiebe (Oerlinghausen), Hein Moates (escht en Schloss Holte - Stukenbrock), Liese en Christian Vaquet (Bielefeld), Elina en Jasch Ditj (Detmold), Olga en Peeta Ditj (Detmold). Tom Jletj kaume boolt soone Lied aus Ruben Ap, Jack Thiesse, Rogier Nieuweboer, Hendritj Siemens, Katerina Jabs, Fraunz Thiesse en vele aundre doatoo.

Dee Vereen Plautdietsch-Freunde e.V. well dee plautdietsche Sproak en Dietschlaunt en oppe gaunze Welt "fördern, pflegen und dokumentieren", heet et enne dietsche Satzung. Neachste Sinowent es en Detmold dan nu aul dee 10. Plautdietsch-Doaginj -- aula Entressede send von Hoate enjelodt, doabie to senne. Buta dee Mettjliedavesaumlinj woat daut doa wada vel tom Horche, Nobre en tom Ete jewe. Rudy Wiebe woat ut sienem Bok Friede wird viele zerstören lese en Jehaun Pana mett siene Frind woare daut Teauta-Stetj Wellkom oppe Forstei von Arnold Dyck oppfehre. Wea well, kaun sich em russlauntdietschen Museum uck eene spezielle Utstalinj tom Teema Forstei-Deenst en Wealoosichtjeit aunseene!

Meea Informatioone send oppe Internetsied vonne Plautdietsch-Frind to finje.

Schatjspeea schlapt nich

2009-09-05T17:51:00.010+02:00

Shakespeare opp Plautdietsch? Tjeen Probleem!

Nu mol wada gaunz offiziell tom Lese en tom Horche bie William Shakespeare's Sonnets for the First Time Globally Reprinted - A Quatercentenary Anthology, lang jesaumelt en schmock toopjestalt von Manfred Pfister en Jürgen Gutsch, rutjebrocht von EDITION SIGNAThUR (Bruno Oetterli Hohlenbaum enne Schweiz) en disem Moonat (Septamba 2009). Dit wundaboare Bok haft Schatjspeea siene Soonate nich bloos em enjlischen Original. Dee Weetenschauftla en Shakespeare-Frind Pfister en Gutsch habe Ewasatinje opp aula groote Sproake en, noch beta!, oppe meschte tjliene Sproak soo's Plautdietsch en disem Bok toopjebrocht -- tom Lese, en opp eene DVD, woone doatoojehet, uck tom Horche! Na, dit es doch wertjlich mol waut Feinet!

Daut Bok haft 752 Siede en dit es doa benne:

"Shakespeare’s Sonnets Global – in states unborn and accents yet unknown" by Manfred Pfister
73 English Essays on the Sonnets in various languages – with anthologies
Detailed information on the contributors

Oppe DVD es dit:

Shakespeare’s original – in script and recital, with a word concordance
The complete text of the book for easy reference
All the translations recited by native speakers
A selection from covers of various international book editions between 1609 and 2009
A selection from illustration suites
A selection from musical compositions of all sorts
Filmclips to highlight certain aspects of the American reception
A comprehensive internet linklist
"Visual Sonnets" of various kinds

Bestale kaun maun biem Verlag via Email signathur@gmx.ch ooda via Fax 0041-(0)71-411 00 91 ooda bie amazon.de ooda aulaweajen enne Bok-Lauftjes. Dee Pries es 100 sfr ooda € 63 fe Bok en DVD toop.

P.S. Hia es Schatjspeea sien Soonat 18 en Soonat 116 opp Plautdietsch en miene aundre Blogs. Daut Foto en disem Blog (bowe) wiest een Kinoplakat mett Coraline -- auf Schatjspeea dit jefaule wudd?

Niejet von PlautCast

2009-07-21T08:19:00.004+02:00

Dise beid PlautCast-Mana send mank ons Plautdietsche weltwiet waut gaunz gaunz Besondret! Endoont en woonem Launt wie Menniste lewe, wie motte Vern Niefelt en Ken Sewautztje (PlautCast/Winnipeg) onbedinjt bie eare Oabeit fe onse Sproak en onse Kultua unjastette!!!

Bie disem PlautCast (Nr. 48, see YouTube-Video bowe) es uck een Interview mettem schwoaten (en plautdietschen!?) NDR-Moderator Yared Dibaba doabie!

Stellet Licht em Kino

2009-04-02T14:04:00.015+02:00

"Stellet Licht licht dicht bie dee Woarheit"
Fritz Lang

Von vondoag aun es dee Film Stellet Licht uck en Dietschlaunt em Kino to seene! Dee eschta plautdietscha Kinofilm! Doa woat nich seea vel jeredt, oba doafea jefft daut schmocke Bilda, eene nich-mennische (?) Jeschicht en vel goode Kritik vonne Presse:

The New York Times (24.9.2008) schreef ver een poa Moonat:
Into the Mennonite World to Explore One Man’s Test of Faith

The Seattle Times (26.3.2009) schreef ver een poa Doag:
In "Silent Light," intense images make a miracle from the mundane

Dee Frankfurter Rundschau (2.4.2009) schrift vondoag:
Über alle Normalitäten des Kinos

Der Tagesspiegel (2.4.2009) schrift vondoag:
Der Himmel über Chihuahua
Dee Frankfurter Allgemeine (7.4.2009) woat schriewe:
Letzte Stunden im Paradies
Dee Film rant leida nicht en groote Kinos soo's Cinemaxx ooda Cinestar. Oba doafea enne Programm-Kinos en een poa groote Steda en Dietschlaunt. Meea Infos doarewa send oppe Siede vonne Plautdietsch-Freunde to finje.

Dee Bilda staume utem Film Stellet Licht, 2007.

Platt gegoogelt! Yahoo!

2009-03-22T14:21:00.010+01:00

Bist du jetzt platt oder plaut? Hab ich dieses Foto gegoogelt oder geklaut?

Hab heute Mittag so gegen 12.30 Uhr einfach mal bei den zwei größten Suchmaschinen der Welt (Google und Yahoo) nachgeschaut, wieviele Treffer sie für Plautdietsch im Vergleich zu Plattdeutsch, Plattdüütsch oder Niederdeutsch liefern:

Google -- Plautdietsch -- 665.000 Treffer
Google -- Plattdüütsch -- 17.300.000 Treffer

Yahoo -- Plautdietsch -- 19.400.000 Treffer
Yahoo -- Plattdüütsch -- 19.300.000 Treffer

Google -- Plattdeutsch -- 312.000 Treffer
Google -- Niederdeutsch -- 178.000 Treffer

Yahoo -- Plattdeutsch -- 1.750.000 Treffer
Yahoo -- Niederdeutsch -- 565.000 Treffer

Und das in jeweils weniger als 1 Sekunde! Kleine Hintergrundinfo: Plautdietsch wird weltweit von ca. 0,5 Mio. Menschen gesprochen, während das norddeutsche Plattdeutsch (Plattdüütsch) von ca. 5,0 Mio. Menschen gesprochen wird. Mit Niederdeutsch wird in der Regel (und vor allem in der Wissenschaft) die gesamte Gruppe (also Platt und Plaut und Co.) bezeichnet...

Einige Schlussfolgerungen:

Überraschung: Die niederdeutsche Sprache ist weltweit am häufigsten unter dem Stichwort „Plautdietsch“ zu finden!
Noch mehr Überraschung: Google liefert doppelt so viele Ergebnisse für „Plautdietsch“ als für „Plattdeutsch“
„Plattdüütsch“ wird in Deutschland von schätzungsweise 20mal mehr Menschen gesprochen als „Plautdietsch“, liefert bei Yahoo aber weniger Ergebnisse!
Unter dem Stichwort „Niederdeutsch“ werden weit weniger Ergebnisse angezeigt als unter den Stichwörtern „Plattdeutsch“ oder „Plautdietsch“.
Integration? Die plattdeutschen Aussiedler bzw. die eingewanderten Russlandmennoniten sind bezogen auf ihre Sprecherzahl und laut Suchmaschinen-Ergebnis im Internet aktiver als die einheimischen Norddeutschen!

Platt gegoogelt! Yahoo!

Schriewe. Bliewe. Uck 2009

2009-01-01T09:40:00.009+01:00

Vondoag es mol wada dee eschta Dach en eenem nieen Joa - aulet Baste wensch etj eenem jiedrem, dee hia opp miene Tweeback-Sied nopptjitjt!

Vondoag mok etj eene tjliene Online-Spende fe dee Wikipedia. En uck ditjoa well etj wada een poa Artikel fe dee plautdietsche Versioon schriewe.

Du vleicht uck!?

PlautCast - Derche Kontinente

2008-10-27T10:48:00.006+01:00

Emma wada (soo eenmol em Moonat?) tjriej etj eene Email ut Winnipeg von PlautCast. Sewautsje (Ken Sawatzky) en Niefelt (Vern Neufeld) send nu aul zimlich lang en pienich doabie en moake wundaboare plautdietsche Sache tom Horche (Podcast, Radio) en nu soogoa uck tom Tjitje (Videos, TV). Daut send t.B. Niechtjeite ute plautdietsche Welt, entressaunte Wadaberechte, Leeda von plautdietsche Mensche oppe gaunze Welt... en emma wada uck dee lostje Jeschichte von Koop en Bua (jeschrewe von Arnold Dyck, jelest von Ron Plett). Ditmol frejd etj mie besondasch, wiels Ken en Vern, dise beid Plautdietsch-Aktiviste, uck daut Leet Hoafst, du doafst enne aktuelle PlautCast-Sendung nennjenome habe!

Ken Sewautstje en Vern Niefelt send nich bloos pienich en kreativ -- see send uck seea musikaulisch! Wea opp eare Internet-Sied jeit, woat daut schwind moatje en boolt emma meea von ahn horche welle! Bie YouTube es t.B. uck daut wundaboare Leet Derche Kontinente to here en to seene:

En disem Faul

2008-09-22T23:00:00.005+02:00

Koomisch, daut etj biem Hoafstaunfang emma wada soo melankoolsch woa... Haud mie vondoag eenfach mol ne oole FRIND-Utgow (Nr. 6) rutjesocht en dee nochmol derchjebledat. Miene Jedichta Hoafst, du doafst en En disem Faul were doa uck benne. Daut latste es oppe Ridjesied vom Heft en fangt soo aun:

Dee Loft em Hoafst en mienem Woolt
Es rein en doch
Fellt mie daut Odme ditjoa schwoa
. . .

En dan rane zimlich vele Trone. Haud mie aune 2002, aus dise FRIND-Utgow rutkaum, nich jetrut, mienen ejnen Nomen aus Autor auntojewe. Etj schreef Fritz Lang - soo heet eena von Mama eare Breeda, woona vescholle we. Waut we bie mie vescholle?

Viktor von Sewen tjemmt mett

2008-09-17T13:57:00.007+02:00

Viktor Sewautztje ut Detmold, friejo utem Orenburja Darp Numma Seven, tjemmt mette Plautdietsch-Frind em Feebua 2009 mett no Belies! En nich bloos auleen, hee nemmt uck siene Fru, siene Ellre en -- sien Mikrofon mett! Viktor es hia en Dietschlaunt dochwoll dee bekaundesta Plautdietscha, woona plautdietschet Radio moakt. Vondoag tom Biespell rant bie SW-Radio een Interwju mett ahm en mie ewa dee Studienreis no Belies -- horch mol nenn!

Bowe oppem Foto vesetjt Viktor, daut Kabel vom Computer-Keyboard trajcht moake - een tjlinet Iesadroht we veboage en dee gaunza Kompjuta we nich to brucke. Uck en soo eenem Faul weet sich "Vietja von Sewen" to halpe. Aun disem Owent haud hee daut Interview mett mie hia em Kentooa vom Vereen Plautdietsch-Freunde e.V. jemoakt. Viktor vetald aun disem Owent uck eene korte Jeschicht ut sienem Lewe fe daut Projatjt Moving Memory...

Moving Mennonite Memory

2008-07-22T17:11:00.004+02:00

Bie dee Plautdietsch-Frind en Dietschlaunt rant em Moment een entressauntet Projatjt: Bie Moving Memory jeit daut omm oole Jeschichte von onse Ellre en Grootellre. Tjinja moake tjliene Videos, en "dee Oolasch" vetale, waut se sich dentje tjene, waut vondoag noch ea Hoat beweajcht... Mett vele korte, truje en lostje Jeschichte woat soo nich bloos onse Jeschicht dokumentet. Uck onse Sproak tjemmt hia seea schmock tom Veaschien!

Dit Foto staumt ut Belize, woo etj nu em Feebua mett Eedi Thun (gaunz rajsch) en Tolik Ditj we. Wie plone fe Feebua 2008 eene Plautdietsch-Studienreis doahan!...

Homer - plaut, dietsch, amerikaunisch

2008-06-07T10:19:00.009+02:00

Emma wada he etj saje: Dee Simpsons haft sich een Pautdietscha utjedocht :-) Na jo, daut stemmt je nich gaunz 100 Prozent, oba meist 100: Matt Groening kaun bestemmt nich meea Plautdietsch (...ooda vleicht doch!?...), oba gaunz bestemmt sien Voda Homer Philip Groening, woona aune 1919 en Kanada manke Menniste jebore es. Sien Oopa haft eene Ooma, woone soogoa dee Dochta von eenem Peeta Wiens es! Dit jefellt mie je dan gaunz besondasch!

Ut Marienburg en Waspreisse es dise Wiensche no Russlaunt jetrocke en haud doa enne Molosch (en Haulfstaut) mett earem Obraum Groening eenen Sehn Fraunz, woona lota dan aul enne USA (Hilsboro, Kansas) jestorwe es. Fraunz sien Groottjint es dee jegraumda Obraum Obraum (AA) Groening, woona dee Oopa von Matt Groening en Oregon, USA, es...

Komplizet? Meea Licht brinjt vleicht dise Sied em Internet:
The Groenings, The Simpsons and The Mennonites

Soo ooda soo: Homer, dee Voda von Matt, es plautdietsch, en Homer, dee Voda von Bart, es dochwoll bloos plaut -- oame Marj Jreeta Simpson, dee mott waut uthoole!...

Dee Bilda send von 2007. Meea Infos ewa daut Frintschauft von Matt Groening es oppe Grandma-CD vonne California Mennonite Historical Society to finje.

Mama

2008-05-11T10:13:00.008+02:00

Dankscheen!!!!

Etj well nich vejete, daut du die dien Lewe lang doafea enjesat hast, daut etj bejriepe mucht:

Dee Mensch lewt nich vom Broot auleen...

Oppe Bilda: Een jreena Sommaborsch mett Suraump -- bie ons em Goade, woo Lukas mett Ooma en Oopa aules soo schmock jesat haft...

Eugen Tiesse en Dima Jaunze

2008-04-05T00:08:00.008+02:00

Dee niee Plautdietsch FRIND Utgow nant dise junge Mana SECOND LIFE MENNISTE - dochwoll, wiels se em Internet jenau soo tus send aus em realen Lewe.

Eugen Tiesse en Dima Jaunze (oppem FRIND-Cover) send dee Utfinja en Moaka vonne esche plautdietsche Kolonie em WWW: Bie plattdeutschland.com send nu aul wiet ewa 4.000 Mettjlieda! Dee meschte noch unja 30 Joa jung, dee Halft soogoa unja 20 -- junget plautdietschet, russlauntdietschet Voltj!

En disem Plautdietsch FRIND Journal (Nr. 21, 2008) es nich bloos een Interwju mett Eugen en Dima to lese -- doa es uck een Berecht ewa Stellet Licht en Cannes, doa send Jedichta, Leeda en Jeschichte. Korte en lange, lostje en ernste! Soogoa von Rudy Wiebe sienem nieen Bok "Von dise Ed" es doa een gaunzet Kapitel opp Plautdietsch publizet - ewasat von Jack Thiesse.

Dee FRIND tjemmt nu bloos eenmol em Joa -- een Grunt meea, dee onbedinjt vonne eschte bette latste Sied to lese!

Maria Pankratz - Molodjets!!!

2008-03-26T08:52:00.005+01:00

Mika Pankratz ut Espelkamp (...hia oppem Bilt toop mett Regisseur Carlos Reygadas en Cannes 2007...) haft afens dem Premio Ariel, dem Mexiko-Oska fe Baste Sied-Schauspelascha (Beste Nebendarstellerin) jewonne - Jletjwensch!!! Toop mett Carlos Reygadas, woona aus Regisseur dem Ariel fe Bastet Bilt en Bastet Drehbok tjrech, haft dee Film Stellet Licht (Luz Silenciosa) von 9 Nominierunge aules toop dan doch gaunze 5 Premio Ariels jetjreaje --

JEWAULTICH!!! Wea haud daut jedocht!?

Hia es meea to lese: 'Luz Silenciosa' takes top Ariel honors

Frooe Oostre

2008-03-24T08:28:00.007+01:00

Vondoag es Oosta-Mondach, dee Helljedoag send meist vebie. Koomisch: Dee Tiet tweschen Wienachte en Oostre schient emma tjarta to woare, dee Joare vegone emma schwinda. Ooda woa etj eenfach bloos emma ella? Schod, daut etj doabe nich uck emma ritja woa ;-) Oba daut haft je soo's aules em Lewe uck siene aundre Sied...

Daut Bilt bowe haft een gooda Frint mol aum Himmel jeseene en fotogrefet. Daut Bilt unje haud etj mol ver Joare fe dem Sabytyj Altar jemolt...

Mexiko-Oska fe Luz silenciosa

2008-03-21T21:42:00.019+01:00

Luz silenciosa - soo heet dee Film Stellet Licht opp Spaunisch. Em Feebua haft daut bie dee mexikaunsche Film-Akademie 9 Ariel-Nominierunge fe Luz silenciosa jejewt!!! Dee Premio Ariel es fe Mexiko waut dee Oscar fe Hollywood es. Neachsten Dinjsdach, aum 25. Moaz, woa wie weete, woovel Ariels (...ooda auf ewrehaupt eenen...) dee plautdietsch-mexikaunscha Film tjricht. Hia send dee Kategorie, woo Stellet Licht nominet es:

BEST PICTURE
Luz Silenciosa
Los Ladrones Viejos
Cobrador: In God we Trust

DIRECTOR
Luz Silenciosa (Carlos Reygadas)
Los Ladrones Viejos (Everardo Gonzalez)
Cobrador: In God we Trust (Paul Leduc)

ACTRESS
Miriam Toews (Luz Silenciosa)
Cecilia Suarez (Parpados Azules)
Irene Azuela (Quemar las Naves)

ACTRESS IN SUPPORTING ROLE
Mariana Moro (Drama/Mex)
Mayra Serbulo (La Zona)
Maria Pankratz (Luz Silenciosa)

ORIGINAL SCREENPLAY
Cochochi
Luz Silenciosa
Partes Usadas

CINEMATOGRAPHY
Cobrador: In God we Trust
Luz Silenciosa
Morirse en Domingo

EDITING
Cobrador: In God we Trust
Los Ladrones Viejos
Luz Silenciosa

SOUND
Cobrador: In God we Trust
Kilometro 31
Luz Silenciosa

COSTUME DESIGN
Kilometro 31
Luz Silenciosa
Parpados Azules

Meea es oppe Siede vonne Academia Mexicana de Artes y Ciencias Cinematográficas (opp Spaunisch) to lese, ooda uck biem Hollywoodreporter (opp Enjlisch).

See uck Oscar-Nominierung für Stellet Licht ooda Carlos Reygadas ooda dit Video bie YouTube:

Plautdietsch-Doaginj 2008

2008-03-07T22:35:00.008+01:00

Nu aul tom 9. Mol haft dee Vereen Plautdietsch-Freunde siene Joaresdoaginj. Mettjlieda en Frind en Entressede send enjelodt, toop daut Dokumentere en Unjastette vonne plautdietsche Sproak veraun to brinje - mett eenem gaunz besondren Instrument: Eingetrager Verein, aulsoo "e. V." Dit es en Dietschlaunt dee Organisatioonsform, woone aum basten doafea to brucke es, kulturelle Oabeit aus Jemeinschauft to leiste. Dee Vereen Plautdietsch-Freunde e.V. es soo eene Organisatioon en haft jieda Joa eene Mettjlieda-Vesaumlinj. Dee ditjoasche es morje, aum 8. Moaz 2008. Daut woat een besondret Prograum jewe runt omm den Internatioonalen Dach fe Frulied, en oppenowent woare Rudy Wiebe en Miriam Toews ut Kanada ut eare Beatja lese...

Prograum fe dee Plautdietsch-Doaginj
en Detmold, Georgstr. 24, aum 8. Moaz 2008

14:00 Mettjlieda-Vesaumlinj (Hendritj Siemens)
15:00 Koffe
15:30 Musik-College-OWL (Jehaun Pana)
Internationala Dach fe Frulied (Tatjana Klassner)
17:00 Poodiumsdiskussioon mett Wieb, Teewsche, Siemens, Wiens en aundre
18:00 Owentkost
19:00 Lesung (Rudy Wiebe, Miriam Toews)

Daut Bilt bowe wiest daut Cover von Rudy Wieb sien latstet Bok. Dee hochdietsche Ewasatinj von Joachim Utz es nu gaunz fresch bie Hendritj Siemens em Tweeback-Verlag rutjekome. Dee plautdietsche Ewasatinj von Jack Thiessen woat uck noch kome...

Viktor von Sewen

2008-03-06T23:14:00.002+01:00

Wietj (Viktor) Sewautstje, soo aus'a oppem Bilt to seene es, es eena vonne baste Mensche oppe Welt. Hee tjemmt utem plautdietschen Darp Numma 7 en Orenburch, lewt nu tweschen Detmold, Lage en Augustdorf en -- moakt goodet plautdietschet Radio! Vondoag we hee toop mett Eedi Thun tus bie mie enne Tjeatj (see Foto unje). Sien Mikrofon haud hee mett, wiels hee dem Eedi en mie een poa Froage ewa dee Menniste en Belize stale wull. Soo spezed wie dan ewent eenen scheenen Owent lang toop, nobade, en dochte aul seea aun eene Plautdietsch-Studienreis em Feebua 2009 no Belies... Wea weet, vleicht beschlut wie daut nu aum Sinowent oppe Joaresdoaginj vonne Plautdietsch-Freunde!? Veaschlone well wie daut weens!

Dee Tiet en dee Frekwenz fe dit Interwju woat oppe Homepage von "Viktor von Sewen" to finje senne. Siene Sied em Internet heet www.opplautdietsch.de en es eene vonne baste en bekaundeste Plautdietsch-Siede em Internet. Doa jefft daut emma waut Nieet, en uck emma wada Informatioone to mennischet Radio...

Martha Thiessen

2008-02-29T07:25:00.008+01:00

Spanish Lookout, 28. Feebua 2008. Aun disem Donnadach-Morje tjitjt Martha Thiessen (Foto) een bet besorjcht opp ea Hoff verrem Hus en wacht opp Lied, woone eenen Deel von eare Maltj aufhole. See en ea Maun Obraum habe ewa 30 Tjej, woone jieda Dach besorjcht woare motte. Vondoag habe dee Thiesses Jast. Dee 3 Mana ut Dietschlaunt foare fots fot, dee Hoarms ut Seminole (Texas) send afens jekome. Daut groote Fast (50 Joa Spanish Lookout) fangt grods escht aun en woat een poa Doag dere...

Oerlinghausen, 28. Feebua 2008. Irjentwoo oppe aundre Sied vonne Ed haft eene gaunz besondre Fru Jeburtsdach - Martha Klose (Klassen), jeborne Thiessen, miene Schwiejamutta! Beid Fruliede wensch etj aulet Baste en Gott sien Seajen fe ea Lewe. Mucht jane doa en Belize eene scheene Jubileumsfeia habe, en mucht dise hia en Dietschlaunt eenen scheenen Jeburtsdach habe!

Entressaunt, daut jane Martha Thiessen mol von Kanada no Mexiko en von doa no Belize utjewaundat we. En daut dise Martha Thiessen mol vonne Ukraine ewa Dietschlaunt no Uruguay en von doa dan wada no Dietschlaunt utjewaundat es. Migraunte! Menniste!! Ajchte plautdietsche Frulied, woone onse Welt beta moake!!!

50 Joa en Belize

2008-02-23T21:10:00.011+01:00

Daut Fast es voll em Schwung. Hia en Blue Creek feire hundate von Menniste nu aul den dredden Dach een groote Party! En morje, aum Sindach, jeit daut wieda. En dan, eene Weatj lota es daut Jubileum en Spanish Lookout -- eene aundre Menniste-Kelnie, woone aul 50 Joa hia es. Hia en Blue Creek spezere Plautdietsche ut Mexiko, Bolivien, Kanada en ute USA toop mett aul dee plautdietsche Beliziauna, woone hia lewe. Aune 1958 send mol een poa Gruppe vonne Ooltkelnia ut Chiuawawa (Mexiko) hia han jekome, habe dem Bosch reinjemoakt, Hiesa jebut, en schaufe nu opp groote Fletja mett Weid- en Akalaunt en tale aus dee Brootkorf von Belize! Jo, dise pienje Menniste hia versorje sich selwst en daut gaunze Launt mett Maltj en Fleesch en Heena en Eia en Ries en wea weet waut noch nich aula. Daut es tom Staune, saje uck dee Bootschafta vonne USA, Mexiko en soogoa dee Deputy Premier Minista -- woona jistre hia uck een poa offizielle Wed sed. En dee Plautdietsche hia tjene jenau soo goot feire aus schaufe! Etj sie nu fe een poa Menut vom Fast veschwunge en nutz daut Internet bie Peeta Rampel em Hus. Sien Sehn Abe gauf mie dem Schletel, wiels hia nu tjeena tus es. Aula send biem Fast, nobre, spezere, ete en drintje scheen, en jeneete daut bunte en entressaunte Prograum. Woa uck fots wada doahan foare. Bie Jeleajenheit well etj meea schriewe en uck een poa Bilda wiese...

School en Shipyard

2008-02-21T08:27:00.005+01:00

Wiels etj grods mett een poa Frind en Belize sie en morje (vondoag!) daut 50-joasche Jubileum von Blue Ckreek aunfangt, tjitj wie ons hia uck dee mennische Kolonie besied aun. Eenen seea scheenen Dach haud etj vondoag mett Eedi Thun, Tolik Ditj en Doft Friesen en Shipyard. Hia lewe Ooltkelnia, soo aus maun uck opp dem Bilt ver dee School von Darp Numma 13 seene kaun. Hia es Lewe. Hia rede dee Tjinja Plautdietsch :-)

Jeloagne Jeschichte

2008-02-14T22:29:00.008+01:00

Rudy Wiebe en Miriam Toews jehere to dee baste Literatua-Mensche en Kanada -- wan nich soogoa oppe gaunze Welt! Nu em Moaz 2008 send send se BEID en Dietschlaunt en woare ut eare "plautdietsche" Betja lesa:

Rudy Wieb ut Of This Earth en Teewse Mitsch ut Ein komplizierter Akt der Liebe...

En beid Betja kome russlauntmennische (plautdietsche) Welte opp eene Oat tom Lewe, daut eene sich wundre mott en nich opphet to staune. Nich bloos, wiels et soo goot es...

Wan Wieb en Teewsche en Dietschlaunt send, woare se opp Enjlisch, Dietsch en Plautdietsch lese en/ooda jelest woare. Hendritj Siemens haft sich seea bemejcht, daut dree Les-Owende mette Plautdietsch-Freunde aus Veaunstaulta tostaund jekome send:

Krefeld Donnadach 6.3.08
Neuwied Friedach 7.3.08
Detmold Sinowent 8.3.08

Wea dee Infos opp Hochdietsch lese well, kaun eenfach dit Plakat aunklicke, dan es et beta to lese.

Nobre. Schriewe.

2008-02-09T08:04:00.000+01:00

Jistre oppenowent funk daut Schriewa-Seminoa fe plautdietsche Autore aun. Meist 20 Lied ut gaunz Dietschlaunt send aunjereist, doabie uck soone bekaunde aus Lore Reima ut Espelkamp ooda Tatjana Klassner ut Warendorf. Aul daut Bekauntmoake we Literatua -- wan tom Biespell Tjnals Petkau looslajcht. En vetalt daut eenem dee Ore brenne. En dee Buck wee deit ;-) Na jo, wea meea weete well, mott eenfach mol vondoag oppenowent Klock 7 vebiekome...

Oppem Bilt: Irina Heinze ut Geseke. Wan wie ewa Plautdietsche Literatua rede, dan hab wie aula noch Winjle aun. Ooda motte noch eene tietlang opp Tjretje gone. Ooda brucke eenfach eenen gooden Sputnik...

Schriewa-Seminoa, opp Plautdietsch!

2008-02-05T07:39:00.000+01:00

Dit es waut Nieet: Nu aum Weatjenenj trafe sich en Oerlinghausen (em St.-Hedwigs Haus) plautdietsche Autore to eenem Literatua-Seminoa. Em Meddelpunkt vom dreedoagschen Trafe stone dee plautdietsche Tatjste vonne Deelnehma, Lyrik en Proosa. Unja dee Moderatioon von Hendritj Siemens en Agnes Jiesbrajcht woat dan jelest, diskutet, jenerrt en jelowt - hopentlich! Etj frei mie aul seea doaropp, wiels etj mie uck doatoo aunjemaldt hab. Schlieslich es dee Veauntstaulta von disem Seminoa dee Literaturkreis der Deutschen aus Russland toop mette Plautdietsche-Freunde. Besondasch frej etj mie opp dee teoreetische en praktische Jedanke ewa plautdietsche Literatua von Siemens! Waut kaun maun ejentlich OPP Plautdietsche ewa mennische Jedichtanalyse saje? Aum Sinowent (9.2.08) von Klock seven oppenowent (19.00) send aula Entressede enjelodt doabie to senne, wan dee Seminoa-Deelnehme utjewehlde Jedichta, Jeschichte en Leeda veadroage.

Wikimax, Wikimoritz

2008-01-09T13:20:00.000+01:00

Vondoag es Bosche Wellm (Wilhelm Busch) aul 100 Joa doot. Oba Max en Moritz driewe noch gaunz lewendich ea Schobanak - aulaweajen oppe Welt, en soogoa opp Plautdietsch! Ver een poa Joa haft Jack Thiessen nemlich dise wundaboare Jeschichte ewasat. En wea boolt uck dee Wikipedia opp Plautdietsch habe well, sull eenfach dee Artikel schriewe, woone noch fehle, tom Biespell Wellm Bosch, Max en Moritz, Schobanak, ... Vondoag es dee Plautdietsch Wikipedia offiziell aus goot jenuch (verified as eligible) enjeschatzt worde! Wikipeeta es bejeistat!!

Dee UNO well Plautdietsch

2008-01-04T13:46:00.000+01:00

Nu tjen Jie daut Schwoat opp Witt vom UNESCO-Chef perseenlich en hia uck opp Plautdietsch nolese: Dee UNO well dee Menniste biem Jebruck von eare Muttasproak Plautdietsch unjastette! Dee UNO well Plautdietsch! Hia es dee Bootschaft von Oomtje Koïchiro Matsuura, dem Generauldirekta vonne UNESCO, presentet oppe Feia tom Internatioonalet Joa fe Sproake 2008.

* * *

Daut Joa 2008 es vonne UNO-Generaulvesaumlinj tom Internatioonalet Joa fe Sproake utjeroopt worde. Dee UNESCO haft dee Oppgow jetjreaje, dee Aktivitete fe dit Joa to koordinere en es entschlote, dit uck to doone en aus droagende Agentua veropp to gone.

Dee Organisatioon es sich vollstendich doarewa em Kloaren, daut Sproake eene bediedende Roll spele, wan maun sich veastalt, woone schwoare Oppgowe dee Menschheit enne neachste Dekaude to leese habe woat.

En daut es wertjlich soo: Sproake send nich fot to dentje, wan et om dee Identitet von Gruppe en eenzelne Mensche jeit, en wan et om een fredsaumet Tooplewe jeit. Sproake send een strateegischa Faktor fe eene Entwetjlung, woone oppe Dua droage saul, en fe een harmoonischet Veheltnis tweschen gloobalem en lookalem Kontatjst.

Eena kaun daut nich hoch jenuch ennschatze, woo wichtich Sproake send biem Eretje von dee sas Ziele biem Prograum Bildung Fe Aula (Education For All, EFA) en vonne Millenium Entwetjlungs-Ziele (Millennium Development Goals, MDGs) – waut dee UNO aune 2000 beschlote haud.

Aus Faktore fe soziale Integratioon spele Sproake opp eene effektive Oat eene strateegische Roll biem Utmerze von extreeme Oarmoot en Hunga (MDG 1). Aus Grundloag fe Lese en Schriewe, fe Lehre en fe auldoagschet Jeschetj send Sproake onbedinjt needich tom Eretje von eene auljemeene Gruntbildung (MDG 2). Dee Kaumpf jeajen HIV/AIDS, Malaria en aundre Krankheite (MDG 6) mott enne Sproake von dee Mensche jefeht woare, om woone daut jeit, wan maun see eretje well. En daut Bewoare von lookalet en enjebornet Weete en von Sach-Tjantnis, ohne doabie daut Secha-Stale von aunhoolendem Omweltschutz (MDG 7) ute Oge to lote, es ontranboa vebunge mette lookale en enjeborne Sproake.

Vel meea noch es kulturelle Velfault seea enj vebunge mett linguistische Velfault, soo aus daut dietlich jemoakt woat enne UNESCO Universaul Ertjlearung to Kulturelle Velfault en em doamett vebungnen Aktioonsplon (UNESCO Universal Declaration on Cultural Diversity, 2001), ooda em Ewaeenkome fe daut Secha-Stale von Nichaunjriepboaret Kulturellet Oawgoot (Convention for the Safeguarding of the Intangible Cultural Heritage) ooda em Ewaeenkome tom Schutz en tom Veraunbrinje vonne Velfault em Kulturellen Utdruck (Convention on the Protection and Promotion of the Diversity of Cultural Expressions, 2005).

Oba wie motte doaweajen doch doamett reatjne, daut mette neachste Generatioone ewa 50 Prozent von dee 7000 Sproake vonne Welt veschwinje woare. Weinja aus een Vedel von dise Sproake woare em Moment enne Schoole en em Cyberspace jebruckt, en dee meschte woare bloos sporadisch jebruckt. Dusende von Sproake, uck wan se von Mensche em auldoagschen Jebruck send, send nich to finje enne Bildungssysteeme, enne Medien en enne auljemeen bekaunde Publikatioonswelt.

Nu es hechste Tiet tom Haundle. Woo? Doaderch en doamett, daut wie eene Sproakpolititj oppem Wajch brinje en entwetjle, woone jiedre Sproakjemeenschauft dee Jeleajenheit jefft, eare eschte Sproak, eare Muttasproak, soo seea en soo foaken aus meajlich to brucke, en dit uck em Bildungssysteem. Wearent doabie uck dee natioonale, dee regioonale en eene internatioonale Sproak beharscht woat. En dee Mensche, woone dee dominaunte Sproak em Launt rede, sele doatoo ermooticht woare, noch eene aundre natioonale ooda regioonale Sproak to jebrucke en uck eene ooda twee internatioonale Sproake. Bloos wan Velsproakichtjeit voll en gaunz akzeptet es, finje Sproake earen Plautz en onse gloobalisede Welt.

Ut disem Grunt velangt dee UNESCO vonne Oobrichtjeite, vonne UNO-Organisatioone, vonne Birjaschauftsorganisatioone, vonne Bildungs-Institutioone, vonne Beroopsjesalschaufte en von aule Interessegruppe, daut see sich meea doafea ensate, daut aula Sproake, besondasch dee bedroohde, Aunertjanung, Unjastettinj en Schutz jeneete, em individuellem en em jemeenschauftlichem Kontatjst.

Dit kaun praktizet woare derch Initiative enne Bildungswelt, em Cyberspace ooda sest woo em Radius von Schriewe en Lese; uck derch Projatjte, woone bedroohde Sproake bewoare sele en Sproake aus Instrument fe soziale Integratioon ensate; derch daut Unjasetje vom Veheltnis von Sproake en Wirtschauft, von Sproake en enjebornet Weete, von Sproake en Kreatioon. Daut es needich, daut dee Jedanke „Sproake send wichtich!“ aulaweajent no veare jebrocht woat.

Dee 21. Feebua 2008, aulsoo dee neajenda Internatioonala Dach fe Muttasproake, woat eene besondre Bediedinj habe en es uck een paussenda Termin, bett wan Initiative tom Nofearebrinje (Promoote) von Sproake veajestalt woare tjene.

Ons jemeensaumet Ziel es, daut secha jestalt woat, daut linguistische Velfault en Velsproakichtjeit enne Bildungs-, Vewaultungs- en Rajchtsysteeme, en uck em kulturellen Utdruck, enne Medien, em Cyberspace en em Haundel aus wichtich aunjeseene woat en aunertjant es em natioonalen, regioonalen en internatioonalem Jebruck.

Daut Internatioonale Joa fe Sproake 2008 es eene gaunz besondre Jeleajenheit fe groote Schred doahan, dit Ziel to erretje.

* * *

Dee Originaltatjst opp Enjlisch es oppe UNESCO-Siede to finje: Message from Mr Koïchiro Matsuura, Director-General of UNESCO, on the celebration of 2008, International Year of Languages. Von doa es uck daut Bilt von Oomtje Matsuura jenome. Bie dise Ewasatinj hab etj mie zimlich aum Original orientet (...een poa Nominaliserunge stere opp Plautdietsch emma noch...) en hab mie deelwies uck een bet Frieheit jejennt, doamett dee Senn beta to vestone es.

Schmaunt oppe Howajrett

2007-12-26T21:02:00.000+01:00

MLU (Mennonite Liars Unlimited)
ooda Schmaund oppe Howajrett

von Jack Thiessen, Winnipeg

"Etj sie seea oam jewast, enn etj sie uck seea ritjch jewese," säd tjeen aundra auls Joe Louis. Dee Jung wisst woavon hee räd, enn daut weet etj, wiels mie daut kratjcht soo jeiht. Enn dit meent: "Daut ritjch senne jeiht bediedend bäta" soo säd Louis, enn etj uck.

Auls etj jung wea, wea daut oam senne noch dolla mood auls vondoag. Joh, daut gauf too dee Tiet sogoa noch oame Prädjasch enn Diakoone, oba see tohlde doafäa uck een huagen Pries: see weare opprejchtijch. Noch eenfacha utjedretjcht: de measchte ritjche Mensche send nijch opprejchtijch, enn seea ritjche Mensche send Schwienäjels, enn aule, soohne manke Bowaschte 500, send aufjebreajde Schwienäjels. Enn nu weet jie. Enn daut säd de Bibel aul ver mie!

Etj hab goot räde, wiels etj aul soohnt ut Erfoahrung weet. Oba nu daut etj soo meea manke bowaschte 600 onlenjs aunjekohme sie, enn etj vesproake hab too vetalle, woo daut doatoo kaum, woa etj daut noch verrem Joahresaufschluss, aulso gaunz aum Zoagelenj vonne 2007 doohne: daut's de Bedinjung enn de Pries, den etj tohle mott fe daut Ritjchsenne enn daut Ritjchbliewe. Dauts de Bedinjung!

Disse Jeschijcht fangt eajentlijch aul ver twintijch Joah aun. Daut Viktor Peetasch, nu aul näjen Joah bowe, too dee Tiet mien basta Frind enn Kollege wea weet Jie. Enn daut etj ahm weens acht Mol daut Joah enne Stäts, woa hee aun Uni. leahd, besocht, weet Jie vleijcht uck; fief Mol emm Somma enn dreemol em Winta.

Enn soo kaum daut, daut auls etj eenmol Enj Juli aune 1987 von Minnesota oppem Huagwajch Numma 59 biem Schemmawoare tridj noh Kanada äwre Jrenz jleppe wull, doa een tjliena krushoaja schwoata Jung noch aune stätsche Sied stund, enn fruag, lieseltjess oba heeflijch, auls etj ahm vleijcht mettnehme wudd. Dee Mensch enn mie säd doatoo: "Nä!", oba dee Mennist enn mie säd: "Nemm ahm mett!"

Etj haud oba noch nijch "Joh" jesajcht, dann haud hee aul gaunz von auleen sijch enn mien Bronco nennjeschlitjcht, enn saut aun miene Sied soo auls wann hee een Deel vom Bronco wea, enn doa aul emma jesäte haud: steil, bescheide enn selwstvestendlijch. Deemootijch wear'a nijch; etj haud je ut ahm noch tjeen Mennist jemoakt, daut sull eascht aules lohta kohme!

Oba etj saut je nu soo haulf enn eene Sementocha, enne Bredulj aulso: etj musst, wann äwahaupt, dissen schwoaten Benjel aun miene Sied, seea boold entweda eene Postmoatjch oppen Hinjarenj backe, enn tridj noh Amerika schetjche, ooda bie de Jrenz soo auls aule Donna leaje, enn ahm eenfach mettnehme. Daut wie Kanädja enn Jrenzsache schratjlijch leaje tjenne uck wann wie Menniste send, wisst etj von miene goode Beziehunge toom MCC. Daut haud de dietscha Konsul, mien Frind Waulta Schmiedehusen enn Cuauhtemoc mie vetalt. Bloos daut see daut aundasch aunjinje: Des Herrn Wille geschehe!

Aulso säde se dann uck fuats aune kanadische Jrenz: "And who is that smart little chap with you?"

"My native buddy!"

"You're on your way."

Wie send unjawäjess; de schwoata Benjel enn etj. Auls etj ahm unjawäjess fruag, waut ahm soo aules scheen jintjch, säd hee: "Soo meea aules, oba aum scheensten jeiht mie daut Golfspäle."

Etj saj too ahm: "Best Du nijch too tjlien omm soo iewrijch Golf too späle?" säd hee bloos: "Watch me, sir!"

Enn soo wear'et dann uck seea boold.

Den näjschten Morje watjcht mie dee tjliene Donna aul tiedijch opp; hee wull goot Howajrett äte, enn dann Golfspäle. Enn wiels mie too dee Tiet daut Golfspäle uck noch soo wijchtijch wea auls dem Kossebock, ooda uck dem Holdemaun de Boat, ooda dem Hohn daut tjreie, ooda dem Mennist de Missjoon, vestund etj, waut mien krushoahja tjliena Frind wull. Biem Golfspäle heat de Sposs opp!

Haud etj junt äwajens vetalt, daut diss tjliene iewaja Hitschheika uck eenen Nohme haud, enn daut diss Nohme, soo säd hee, Tiger Bush wea?

Dee tweede Froag ess: "Kunn hee dann uck eenjamohte Golf späle?"

"You better believe it" säd jana. Enn etj uck.

Dee Tiet, soo auls wie weete, jeiht langsomma wann eena jung ess. Daut lijcht doaraun, daut dee groote Fada enn uck de Duracells enn Gott sienen Big Ben, enn siene jewaultje Uah aulso, noch niea weare, nijch utjeschieaht.

Doamett well etj bloos saje, daut dee easchte poah Joah mett Tiger so scheen jinje, daut see boold vestritjcht weare.

Etj säd scheen jinje, enn meen daut. Tiger späld Golf daut de Schnodda Fiea foot, enn wann hee hanennwada een bät nohleet, dann phoond etj bloos mien Kollege Al Reima opp, enn dann läd Tiger sijch enne Pluche, speajch sijch enne Grauje, sad sijch siene Schildmetz mett "Bush leads to the Woods" doabowe, enn dann jintjch daut reesch too. Dauts nijch, daut Bosche Tiger soo tigga wea, oba hee späld von Hus ut seea goot Golf, enn Reima wea ahm nijch wiet hinjeraun. Etj bejneajd mie too dee Tiet measchtens emma mett dem dredden Plautz; buta enne Vetall, dann jewonn etj meist soo foaken auls etj wull. Soo ess daut. Enn wann jie mie daut nijch jleewe, dann vestoh jie vom Golfspäle weinijch.

Oba tridj noh de Tiet, enn woo dee mett eenst mennisch word, enn daut drock haud. Oba eea wie Tiger aufreise leete, joh, eea Al enn etj ahm nohm Bohnhoff nauhme, von woa aule Ziej noh de Statsjoon "ENJ" foahre, drunk wie dree jemeenschauftlijch toop noch een Aufscheedsbeea, oppem Pine Ridge, enn wiels Al enn etj jegrommde Tjeadels send, gauw wie Tiger noch een bätje Roht, enn uck Jeld: Roht? Soo's dit: "Jung, wann Du toom seea gooden Golfspäla woare wellst, dann mottst du soo schwind auls mäjlijch den Nohme Bosch ooda Bush auflaje, wiels bie dem Nohme jleewt die tjeen Mensch nuscht nijch. De Nohme Bush ess een veloagna Menschenstaum.

Enn waut pessead? Dee Tiger wescht sijch een poah Trohne, läd seine Schildmetz auf, (dee henjt bie Al Reima enn sien tjliene Villa aum Eewa vom Lake Winnipeg), enn dann läd hee uck fuats doabie sienen Nohme Bush auf, enn läd sijch den Nohme Woods too, oba wiels dee Nohmeswatjsel hiea enn Kanada emmahan veeahundat Dohla kost, liehd Al enn etj ahm daut Jeld doatoo.

Waut Al dem Tiger biem Aufscheed noch too saje haud, weet etj nijch. Waut etj oba weet, enn mie doawäjen uck nijch seea wundat, ess daut Tiger mie biem Aufscheed säd: "Ohmtje Thiesse (nu oba aul schmock opp Plautdietsch), etj well mie bedanke. Enn nu eene Bedd: 'Spält wiedahans Golf, enn dentjcht doabie aun mie, oba etj well Weltmeista woare, enn doawäjen hoolt mie bitte dem Al Reima vom Lief, dann jeiht daut schwinda enn jleia, wiels wann dee soo wieda moakt, woat mie dee Mensch noch toom Tjneppel tweschen Been, joh?'

Etj vesproak ahm daut. Dann säd Tiger Woods, dee väja Bosch: "Wann Jie, Oohmtje Thiesse, doafäa sorje woare, daut Al mie nijch doatweschen tjemmt, enn ahm mie vonne Hacke hoole woare, dann woat sijch daut fe Junt eenes Doages, nijch bloos loohne, oba Jie woare jieden Dach junt staut Maltjch mett 2%, Schmaund von de ditjche Sort too de Howajrett leiste tjenne."

Enn kratjcht soo ess daut jeworde: Enn wiels daut vesproakne Jeld jiedet haulwe Joah ernoa toonauhm, leewa jesajcht toonemmt, läd etj, soo auls daut aule wijchtje Mensche, enn uck Mennoniete doohne enn moake, eene Stiftung, vleijcht uck Steftung aun, aulso een Foundation, enn disse rannd bäta enn jleia enn woat schwinda auls eene elloagsche Arbus groot enn jrata: Disse Steftung jefft'et nu aul opp dree Städe: dijchtbie Steinbach, dijchtbie Abbotsford enn dann uck enne Boaj dijchtbie Denver, enn Colorado aulsoo:

Enn disse Steftung heet gauns schlijcht enn eenfach, oba opprejchtijch:

MLU (Mennonite Liars Unlimited)

* * *

Dise Jeschicht laus etj vondoag zemorjens en eene Email von Jack Thiessen -- musst mie meist dootlache! Aus etj moatjd, daut etj doch noch lewd, froch etj Thiesse, auf etj dise Jeschicht en mien Tweebak-Blog doone kaun. Hee schreef tridj: "Joh, leewa Frind Peete, Blog mie enn miene Jeschijcht bett de Schnodda Fiea foht!" Bie soo eene Auntwot haft eena daut Jefeel, daut Wiehnachte es -- Dankscheen, leewa Frint Jack!

Tiet frat Leew

2007-12-16T12:21:00.000+01:00

* * *

Lot mie toch oppe Tjast von eenem Hoat
Mett eenem Hindanis! Leew es nich Leew
Dee aundasch woat, wan aundret aundasch woat
En nojefft aus dee Schuwlod eenem Schleef!

Oh ne, see es een ennjepoldet Iesa
En woat vom stoatjsten Boll nich rutjerete
See es een Stern, fe Wajch en Tiet een Wiesa
Man sitt se nich, en kaun se nich vejete!

Wan Tiet dee Leew frat aus dee Sans daut Hej
Soo schient et - roode Leppe woare blaus! -
Schniede Dach en Stund dee Leew nich twej
Dee Leew sajcht: Waus! Uck aum Enj noch sajcht’se: Waus!

Wan mie wea wist, daut faulsch es waut etj schreef
Es dit nich Tint, dan jefft et tjeene Leew!

* * *

Dit es Shakespeare sien Sonett 116 -- haud etj ver een poa Joa mol opp Plautdietsch ewasat, jefellt mie emma noch. Besondasch vondoag, aum dredden Advent. Leew bruckt Tiet, Leew mott wausse, opp Leew mottst wachte tjene... En Leew kaun uck soo schmock aus Sonett 18 senne....

Chris Cox, Mark Twain, ...

2007-12-09T08:37:00.000+01:00

Ver een poa Doag jintj dee Norecht derche Welt, daut Chris Cox ut Kanada...

Oba tom Jletj: Hee lewt! Hee es jesunt en aum Lewe, daut we bloos eene Vewatjslij. Trurich en jletjlich tojlitj! Dit hia schreef dee junga en lewendja Chris Cox ut Kanada jistre bie Plautdietsch-L aun aula Lesa:

Leewe Plautdietsche,

ekj well je mau schwind mol waut schriewen, doamet Ji aula weeten, daut ekj noch emma aum Läwen si! Jo, ekj doo hia opp disen Eadbaul noch emma plautfootig 'romzaublen, soo goot aus daut mau afens jeiht -- doarom bruk Ji junt aul nuscht kjemmren!

Een Poa Doag trigj es een aundra Jung von Saskatchewan platzlich jestorwen, waut meist kraikt dän selstjen Nomen haud aus ekj, un daut word dann en Kaunada wiet un breed bekauntjemöakt. Ekj jleew, doawäajen gauf et een kjlienet Messveständnis. Mi kjemmt daut nu soo väa, daut es je meist kraikt soo aus Mark Twain e'mol säd: wann de Lied doa aula meenen, ekj si jestorwen, dan es daut je mau bloos äwadräwen worden -- uk e'mol sea!

Na jo, schoden deed daut aulatoop nuscht, un ekj si dankboa, daut et hia soone Menschen jefft, waut sikj wudden Tiet nähmen, aun miene Frind un Frindschoft to denkjen wan doa mol waut passiat wea. Nu mott ekj mi doaväa bloos noch väl dolla freien, daut ekj noch soon harrlichen Wintadag, soo's daut vondöag hia en Edmonton jefft, erfoahren kaun!

Lot et Junt aula scheen gohnen!

Chris Cox es escht 24 Joa oolt, oba hee we enne eschte Halft vonne 90ja Joare dee eschta oppe Welt, woona eene Internet-Homepage opp Plautdietsch en ewa Plautdietsch mok. Uck daut plautdietsche Email- en Diskussioonsforum em Internet Plautdietsch-L haft Chris mol toop mett Ruben Ap aunjefonge -- eene wundaboare Sach, Kompliment! Mott Chris onbedinjt mol froage, auf hee nich bie dee Plautdietsch Wikipedia mettmoake well!?...

Hee tjemmt...

2007-12-02T22:45:00.000+01:00

...boolt.

Ons Lexikon

2007-12-01T15:22:00.000+01:00

Daut moakt eenfach Spos, doa benne to lese: Daut niee Lexikon der plautdietschen Sprichwörter, Gedichte, Rätsel und Lieder es een gaunz besondret Bok! Tajana Klassner ut Warendorf haft aul ver vele Joare manke Plautdietsche em Altai jesaumelt en jesaumelt en oppjeschrewe, uck lota dan hia en Dietschlaunt pienich wieda oppjeschrewe, wan en woo uck emma see waut to here tjrech. Nu haft Heinrich Siemens ut Bonn daut schmock to eenem Bok toopjestalt (meist 300 Siede!) en ewa sien nia Verlag mettem Nome Tweeback rutjebrocht. (Oba Lied!, haft hee sich dem Nome bie mienem Blog hia jetjlamt!? Endoont! Tweebak kaun sich jiedra nane, schließlich et wie daut je uck aula jern. Weens meist aula!...)

Noch eene Predicht

2007-12-01T13:28:00.000+01:00

* * *

Bruck dem Dach
Breatj daut Dak
Lot die rauf en sie mol ruhjch
Brucks nich stehne
Hee sitt dien Sehne
Lat sich Tiet en tjitjt die aun

Sto opp en schauf
Bruck dem Dach
Es nich schwoa fe ahm to saje
Bloos daut Tjlame
Em Jewesse
Jeit doamett nich wajch

Sehn, sajcht hee
Dee Schult es fot
Etj nehm aules opp mien Ridje
Nu sto opp
Wausch dien Kopp
Stoatj dien Hoat mett ajchte Leew

* * *

Dit Jedicht haft vondoag "anonym" aus Kommentar bie mienem Blogpost Bruck dem Dach jeschrewe. Jefellt mie! Velangt waut von mie, soo, aus daut es, wan du eene goode Predicht hescht: Daut es nich emma maklich, oba du weetst jenau, daut du jemeent best... (Dee Link no Markus 2 we em Original nich enjebut, dee Schriewwies hab etj aune Plautdietsch FRIND Schriewwies aunjepausst.)

Eene Predicht

2007-11-26T21:29:00.000+01:00

En eene Email von Jack Thiessen laus etj vondoag disen Rudy Wiebe Tajtst hia:

* * *

Enn eenmol, oba bloos eenmol stund een Indiauna Heiptlinj, mett Fadre rommen Kopp enn delenjd sien langen Ridje soo auls enn eenem Bildabuak hinjre Kaunzel ver dee Pracht-Orjel-Piepe. Hee hoof siene Oarms breet opp, soo daut de lange Frense von siene witte Ladajack langsom fäjde, enn dann vetald hee ons, woo de Tjennitj George enn de Tjeenijen Elisabeth vom Buckingham Paulaust ahm enjelohde haude. Auls hee doa wea haud hee ahn jefroagt, auls see aun Gott jleewde. Enn de Tjeenijen haud too ahm jesajcht: "Joh, daut doo wie!"

De groote Tjoatjch explodead mett Klautsche, Weifle enn Piepe! Etj haud soowaut noch niemols verhäa enn eene Tjoatjch jeheat, oba dit wea soo vebleffend; vleijcht muak etj sogoa mett: enn London, Enjlaund, de groote Hauptstaudt vom Enjlischen Weltritjch, dee auls Sieja jefieaht worde nohm jratzten Tjrijch enne Weltjeschijcht, London, woa Oohmtje Winston Churchill
räd, enn woa dee Big Ben noch emma derjch de gaunze Welt tjlinjad, enn derjch den gaunzen Tjrijch jebimmelt haud, doa em Buckingham Palace jleewde de Tjeenijen enn de Tjennitj aun Gott! Woo kunn soohn tjlienet Bauljch von eenem saskatchewanschen Mennonitenbosch dann nijch uck jleewe?

Diss kanadischa Indieaunaheiptlinj unja mie hinjre Kaunzel enne Tjoatjch enn St. Giles, Patron vonne Tjräpels, enn dee haud mett ahn jerät, enn dann foll mie daut platzlijch bie, daut wann diss Maun, ahn eene soohne Froag jestallt haud, dann musste see bie de Woahrheit bliewe. Hee jintjch nijch doa enne Tjoatjch 'eromm enn oakad mett de Oarms enn schreajch nijch 'romm; hee räd ruhijch mett eene jettlijche Wirde, enn hee bruckt nijch bloare ooda dreiwe soo auls de Evangeliste; hee vetald die waut ahm pessead wea, enn dann wisst du. Hee haud jefroagt, enn de Tjeenijen haud perseenlijch jesajcht, "Joh."

* * *

"Soo schrift daut eehemolje Bauljch utem saskatchewanschen Mennonietenbosch aka Rudy Wiebe!", schreef mie Jack Thiessen en eene Email vom 25.11.07, woo dan dee Wiebe-Ewasatinj, woone bowe to lese es, uck benne we. Jack Thiessen (Winnipeg) haft Rudy Wiebe sien nieet Bok mettem Titel Of This Earth opp Plautdietsch ewasat en gauf mie dee Erlaubnis, disem Utschnett hia em Blog nenn to stale. Bie RandomHouse.ca (oppe Websied fe Wieb sien Bok) kaun maun utem enjlischen Original disen Prologue-Utschnett lese:

“Nu es et Tiet,” my mother would say in the Russian Mennonite Low German our family always spoke together. Now it is time. And my father would get up to wrap his bare feet in footcloths and pull on his felt boots with rubbers over them, hook his heavy mackinaw and fur cap off the pegs by the door and go outside with the neighbour we were visiting. [...]

Koddrich en lostich...

2007-11-16T23:16:00.000+01:00

Hia send een poa Bilda von latsten Meddweatj - aus wie onsen Voda (Hauns Wiens ut Moajnau, Molosch) begrowde, en dan noch eene Tiet lang mett Mutta, Frind en Jeschwista toop were. Daut gauf vel Trua, Leew en Hopninj to speare...

Plattdeutsche Buchmesse 2007

2007-11-11T19:24:00.000+01:00

Meddel en Hamburg es jieda Joa em Novamba dee nadadietsche Literatua-Welt gaunz oppjereajcht: Dee 10. Plattdeutsche Buchmesse we ditjoa schult! Dise weltwiet jratste nadadietsche Bok-Tjast haft von Joa to Joa emma meea niee Titel, Verleger -- en Mensche, woone sich doafea entressere. Jistre en vondoag were dee Deare op fe aula, woone waut freschet lese, seene ooda here wulle. Dachewa gauf daut veschiedne Lesinje mett bekaunde nadadietsche Schreftstala.

Dee Collage wist een poa Bilda vonne Eröffnung aum Friedach, aum 9. Novamba 2007. Etj we doa mett Anne en wie troffe doa uck aundre Plautdietsche, t. B. Hendritj Siemens. Oppem Foto enne Medd vonne Collage steit hee toop mett Dr. Reinhard Goltz, dem Leida vom INS en President vom BfN. Goltz we uck Metjliet bie dee Jury, woone daut "Plattdeutsches Buch des Jahres" bestemmde en wearent dee Feia aum Friedach oppenowent bekaunt gauwe:

Daut Bok Ebbe un Hehn von Birgit Lemmermann schildat dee Erlewnisse vom 13-joaschen Thadde, woona sich vom Tjint tom Jugentlichen entwetjelt. Mank Femilje, School, Jefeele en Dreem lewt dee junga Tjedel sien gaunz en goa nich ooltmoodschet Lewe en finjt aulahaunt ut - uck weajen eene gaunz besondre Mejal... Dee Jury lowd nich bloos daut literarisch Besondre en Goode aun disem Bok. Uck dee Illustratioone send butajeweenlich entressaunt en schmock jeworde! Dee Lemmamaunsche (dee Autorin) schreef extra fe ons Plautdietsche eene Widmung em Bok nenn! Daut Bok steit nu en Detmold em Plautdietsch-Kentooa em Regal. Bestale kaun maun daut uck ewa Amazon.

Daut nadadietsche Bok-Fast en dee Bok-Pries woare jieda Joa vonne Carl-Töpfer-Stiftung jesponsat. (Dee Tapasch motte zimlich jescheide Mensche senne!...)

Wiki, 4711, Keloon

2007-11-04T09:54:00.000+01:00

Jistre oppenowent troffe sich Wikipedia-Mensche biem Stammtisch Köln. Wiels mie dee Wikipedia seea jefellt en wiels etj dise Opne en Friee Enzyklopeedie uck fe miene ejne Interesse emma meea bruck, niesched etj een bet en besocht eenfach mol disem Staumdesch. Entressaunte Mensche. Een poa Kontakte jemoakt, dee bestemmt uck fe dee Plautdietsche Wikipedia von Nutze senne woare...

Aus etj oppem Wajch nohus we, docht etj doarewa no, woo dee Staut Köln ejentlich opp Plautdietsch heet: Köln? Keloon? Aundasch? En woo heet ejentlich daut feine Wota mette Zohl 4711 opp Plautdietsch: Eau de Cologne? Одеколон? Oontjekoloontje? Keloonschet Wota? Endoont. Enne Wikiwelt es aules meajlich. Meist aules...

Daut Bilt bowe es een Cafe en eenem grooten Kino, irjentwoo tweschen Keloon en Paris, utem Somma 2007.

Hezhgrul, Schlorre, Balalaika

2007-10-28T21:46:00.001+01:00

Kruft 2007. Jieda Joa em Oktooba dee latsta Sinowent: Dan es dee plautdietsche Welt to eenem kulturellen Trafe enne Vulkanhalle von Kruft enjelodt. Dise Staut licht irjentwoo tweschen Neuwied en Koblenz, nich wiet von Bonn, woo dee aktive en kreative Tina Wedel wohnt.

Tina haft disen Plautdietscha Nomeddach (jistre aum 27.10.07) nu aul tom dredden Mol organiset -- toop mett eare Bonna Grupp en en Kooperatioon mette Plautdietsch-Freunde e.V. Uck ditmol gauf daut wada een entressauntet en buntet Prograum mett vel Musitj, Sketche, Leeda en Jedichta. Uck "ooltmoodsche" mennische Tjleeda worde wada presentet, niee Betja, CDs en Bilda were to tjeepe, en fresche Tweebak fehlde nich. Hia kunn soo maunch eena sich mol wada soo rechtich "tussich" feele...

Oppe Fotos (von bowe no unje): Daut niee Bok von Tatjana Klassner en Heinrich Siemens utem Tweeback-Verlag, Tina Wedel mett Mikro en mett Frind oppe Behn, dee Schlorre-Grupp biem Daunze, twee oole Frind biem Musizere, Hezhgrul Peeta Brun halpt ons dentje, daut wie Mensche send, Hannah Siemens schmenjt fresche Tweebak, woone Marina Jaunze noch vegone Nacht jebakt haud...

Carlos Reygadas

2007-10-16T14:12:00.000+02:00

Dis Mexa (ooda beta: Mexikauna?) es wertjlich een entressaunta en sondaboara Mensch: Kaun selwst tjeen Plautdietsch, oba moakt eenen Film opp Plautdietsch! En dan noch waut fe eenen!!!

Carlos Reygadas sien Kinofilm Stellet Licht haft nich bloos oppe Premiere en Cannes eenen Pries en seea goode Kritik jetjreaje. Uck opp veschiedne aundre internationale Film-Festivals es dit schmocke en stelle "mennische" Kunstwoatj aul jewese - en dee Zeitunge schreewe en schriewe Goodet en soogoa seea Goodet! Nu grods es dee Jury vom Filmfast en Chicago gaunz bejeistat, soo aus enne El Paso Times (opp spanisch) ooda enne Chicago Sun-Times (opp enjlisch) to lese es. Reygadas sien Stellet Licht tjricht doa nu grods dem Gold Hugo. (Von disem Tia hab etj verhea noch nuscht jehet, wan etj opprechtich sie...)

Endoont. Etj bliew jespaunt, auf ons Mexa daut noch bettem Stella Oska en Hollywood schauft - wensche wudd etj ahm (en ons!) daut!!!

Interwju mett Carlos Reygadas: Daut Foto bowe mok etj aum 22. Mei ditjoa en Cannes, kort verre Weltpremiere von Stellet Licht. Wan onse plautdietsche Lied interwjut worde, dan deede dee uck opp Plautdietsch rede, en etj haud dee feine Jeleajenheit daut opp Enjlisch to ewasate. Ooda omjedreit. Oba hopentlich nich vedreit...

To stell fe Hollywood?

2007-10-12T16:51:00.000+02:00

Opp disem Bilt freie sich Tjnals Waul (Cornelio Wall, linjsch von mie) en Mika (Maria) Pankratz opp dee Premiere von Stellet Licht en Cannes aum 22. Mei 2007. Daut we een scheena Dach! En dee 24. Feebua 2008 woat vleicht uck een sonnja Dach, wiels: Dise Weatj haft daut Launt Mexiko dem Carlos Reygadas sien Kino-Woatj offiziell fe eene Oscar-Nominierung en Hollywood veajeschloage - enne Kategorie Basta framdsproakja Film.

Von vondoag aun es Stellet Licht enne Kinos en Mexiko to seene, boolt uck en aundre Lenda. Stellet Licht es dee eschta internationala plautdietscha Kinofilm. Dee enjlischa Titel es Silent Light, dee spaunscha Luz silenciosa. Doamett dee nich-plautdietsche Lied uck vestone, waut en disem Film jesajcht woat, rant unje em Bilt emma dee laundessproakja Tatjst mett.

Dit Foto (bowe) es von Hendritj (Heinrich) Siemens ut Bonn. Hee es dee nia President von Plautdietsch-Freunde e.V. en we em Mei 2007 uck en Cannes doabie. Meea opp Hochdietsch uck bie Stella Oska.

Dee Droom vom Zockaboom

2007-10-06T15:40:00.000+02:00

* * *

To vel Koffe? To vel Tee?
Wea weet, daut woat vleicht uck een Droom
Jewese senne
Dee Klock, dee jeit nu aul opp dree
Etj schweet, etj dreem, mien
Oppjeweeldet Hoat
Daut puttat aus een Framda aune Dea
Wea weet, daut sie vleicht uck
Etj selwst! Etj schlop
Etj kom em Droom nohus no mie
Etj dreem Jeschichte utem ejnen Lewe
Dee noch niemols soo pessiet send
Dreem von Leew en Angst en Jefft en Torte
Dreem von Fiend en Frind en aula Sorte
Zockabeem!
Een Biet Broot mett Solt en Zipple
To vel Koffe? To vel Tee?
Wea weet, daut woat vleicht uck dee
Zockaboom jewese senne
Dee Zockaboom doa bute verre Dea
Jo, soone Beem, dee wosse aul en miene
Russlauntdietsche Dreem
En haude dee doa aundre Bleda
Soo pusd dee Wint doch meist soo grulich
Derche Asta
Wan et Nacht we
Rand wie fot
En sochte deep en onse Dreem
Wacholdabeem en funge emma bloos
Dee Notle
Wie watje opp mett Koppweedoag
Dit send aundre Siede
Aundre Bleda
Bute schniet et, Blott es aune Reda
Bute woat et wada dunkel
Bute! Benne oba schient dee Sonn
En schient to dach, to stell, to heet
Etj schweet, etj dreem, mien
Framdet Hoat ut Holt well nenn, well rut
Daut puttat aune Dea
Woon Droom, woon Boom
Opp woone Sied, opp woonem Blaut
Daut es nu aula derchenaunda
Etj bruck noch een bet Tiet
Sajcht eene Stemm
Schlop moa, schlop moa
Es doch aules haulf soo schlemm
Schlop en dreem, en lew dien Droom
Von janem Zockaboom

* * *

Dit Jedicht we aul mol em Novamba 2005 publizet - uck bie Plautdietsch-L. Bowe oppem Bilt es daut Cover vonne Numma 17 vonne Tietschreft Plautdietsch FRIND to seene...

Wea weet...

2007-10-06T13:44:00.000+02:00

* * *

Wie stone jieda Dach opp
Wie habe daut emma soo drock
En daut, waut wie doone
Daut mott sich uck loone
Dee Welt saul doch seene
Daut Goode en Scheene
Bie ons!

Opp Oabeit schweet wie ons meed
Send pienich en emma reed
En daut, waut wie doone
Daut mott sich uck loone
Dee Boss saul doch seene
Daut Goode en Scheene
Bie ons!

Nomeddach kohm wie nohus
En Oabeit finj wie uck tus
En daut, waut wie doone
Daut mott sich uck loone
Dee Fru saul doch seene
Daut Goode en Scheene
Bie ons!

Aum Sindach go wie to Tjoatj
Wie spende fe een goodet Woatj
En daut, waut wie doone
Daut mott sich uck loone
Ons Gott saul doch seene
Daut Goode en Scheene
Bie ons!

En dan send wie uck mol oolt
Dee latste Stund tjemmt dan boolt
Wie tjene nuscht doone
Waut woat sich nu loone?
Es nu noch to seene
Daut Goode en Scheene
Bie ons?

Wea weet...

* * *

Tom eschten Mol publizet bie Plautdietsch-L, Oostre 2000 - see uck Ewasatinj opp Nadadietsch ("KEEN WEETT...", von Ron Hahn ut Seattle/USA)

Tom Bilt bowe: Jistre sach etj en Aachen dem Film Ratatouille. En disem schmocken Kinokomplex honge uck Filmposter fe Die Vorahnung mett Sandra Bullock. Etj mok een Foto vom Plakat...

Russlaunt, Dietschlaunt...

2007-10-03T11:39:00.000+02:00

...en Weit, soo wiet aus dee Oge retje. Wie seie Leew en Stried en Edschocke, en wie tjriee uck emma wada, waut wie seie: Leew en Stried en Edschocke. Jieda Dach. Jieda Joa. Wie tjriee Tjinja, wie bue Hiesa, wie tratje von eenem Launt nom aundren. Onse Tjinja velote ons, wie velote onse Hiesa. Weit wausst emma wada, woo wie send, en woo wie nich send. Vleicht were dit onjefea dee Jedanke, woone mie derchem Kopp jinje, aus etj mol irjentwan enne latste 17 Joa dit Jedicht schreef:

Russlaunt, Dietschlaunt: Han en tridj
Haulf bedieselt sto wie opp
Bitt ons hia ne rusche Midj
Ritt ons doa een dietscha Kopp!

Wie trocke wajch ut janem Launt
Woo ons dee Schereschliepa lowde
Trock ons daut Hoat? Trock dee Vestaunt?
Fot von woo wie Edschocke vegrowde...

Opp emma oppe Sted to kloffe
Ne, daut es ons nich dee Sach!
Trurich, waut wie hia mol troffe
Naum sich dee Nacht, meist ewadach!

Soo tratj wie wieda, emma wada
Velote Nobasch, Hoff en Hus
Fe ons es dise Welt ne Lada:
Krup wie nohecht? Send wie boolt tus?

Woo Leew licht

2007-09-29T22:52:00.000+02:00

Dee Menniste habe ditjoa eene groote Premiere von eenem Kinofilm jehaut - Stellet Licht, mett eenem Pries en Cannes. Buta dee Menniste jefft daut noch vele aundre tjliene Sproakgruppe oppe Welt, woone noch vel to weinich bekaunt send, t.B. dee Arameea (Aramäer, uck Assyrer jenant). Dee Mensche, woone dee Muttasproak von Jeesus rede. Daut latste Mol hed dee Welt dise Sproak en Mel Gibson siene Passioon von Tjristus. Vondoag haud dee eschta Kinofilm, woona komplett opp eare Sproak jedreht es, Premiere: Darbo D'hubo. Hia en Dietschlaunt, bie mie omme Atj en Gütersloh. Etj haud Jletj en we uck ennjelodt en vebrocht vondoag dem Nomeddach en dem Owent mett eene Stadthalle voll Arameea, en daut we seea entressaunt! (Bowe oppem Bilt es Nahrin, woone sich meist mett eenem befriee musst, dem se nich wull, oba dan, irjentwoo en Tur Abdin, kaum aules aundasch... Vondoag tjitjd se schmock en miene Kamera :-)

[Meea ewa dem Premiere-Owent schreef etj opp miene aundre Blogsiede bie Wer sind eigentlich die Aramäer? en Über Gütersloh nach Tur Abdin nach...]

Dit Sied - Jant Sied

2007-09-23T11:51:00.000+02:00

Dit es miene Groosma, Auna Wiens, eene Kausdarpsdochta. Musst vondoag vel aun ahr dentje. See es aune 1902 en Moajnau (enne Molosch, Ukraine) jebore en haud mett ewa 100 Joa, aus see en Dietschlaunt stoarf, een beweajdet en lota ruhjet Lewe hinja sich. Woo es see nu? Waut deit see nu? Vleicht schockelt see emma noch, irjentwoo opp Jant Sied...

Latste Weatj mok etj bie onsem Woolthustje een poa Bilda. Aus etj dee dan opp eene Word-Datei (8 MB) schmock toopstald, foll mie opp, daut etj goa nich weet, auf etj mie meea no ditsied ooda no jantsied bang. Schod, daut etj mie mett miene Groosma nich soo aus mett eene Podruschka vetale kunn. En jern haud etj uck mett earem Sehn Hauns een bet meea jeredt... Papa, woo seea litjen etj no die?

Wikipeeta

2007-09-03T12:58:00.000+02:00

Kunn latste Nacht nich schlope. Drunk eenen schwoaten Tee en tjitjd em Internet, auf emma noch tjeena eene plautdietsche Wikipedia aunjefonge haft. Funk nuscht. Keteijd mie een bet mank Miljoone von Wiki-Informatioone en mok schlieslich eene Request-Sied foadich en schreef uck fots een poa plautdietsche Wikipedia-Artikel. Mol seene, auf daut waut woat... Dochwoll wada eene Sach, dee etj aunfang, en nich to Enj brinj. Tom Jlet es maun bie Wikipedia nich opp sich selwst jestalt. Dee Open Source Idee jefellt mie...

Haulfjebakt?

2007-09-01T23:02:00.000+02:00

Opp dise Tweebak-Blogsied well etj han en wada mol schriewe, waut mie manchmol soo derchem Kopp jeit. Tom Biespell een oolet ooda freschet Jedicht opp Plautdietsch. Oode eene Informatioon ewa irjentwaut Nieet ute plautdietsche Welt. Ooda eenfach een poa Strotschki. Foaken es je daut bloos waut Haulfjebaktet, nich gaunz Utjerieptet, oba soo es daut dan ewent.

Opp disem Bilt spejelt sich een Deel von onse Tjeatj - em Glaus von eenem aundren Bilt: Een mennischa Predja vetalt sich mett siene Fru, jemolt von Rembrandt. Etj funk dit Motiv bie Rudy Wiebe opp dem Cover von sienem Bok Sweeter Than All The World...