Sonntag, 28. Oktober 2007

Hezhgrul, Schlorre, Balalaika







Kruft 2007. Jieda Joa em Oktooba dee latsta Sinowent: Dan es dee plautdietsche Welt to eenem kulturellen Trafe enne Vulkanhalle von Kruft enjelodt. Dise Staut licht irjentwoo tweschen Neuwied en Koblenz, nich wiet von Bonn, woo dee aktive en kreative Tina Wedel wohnt.

Tina haft disen Plautdietscha Nomeddach (jistre aum 27.10.07) nu aul tom dredden Mol organiset -- toop mett eare Bonna Grupp en en Kooperatioon mette Plautdietsch-Freunde e.V. Uck ditmol gauf daut wada een entressauntet en buntet Prograum mett vel Musitj, Sketche, Leeda en Jedichta. Uck "ooltmoodsche" mennische Tjleeda worde wada presentet, niee Betja, CDs en Bilda were to tjeepe, en fresche Tweebak fehlde nich. Hia kunn soo maunch eena sich mol wada soo rechtich "tussich" feele...

Oppe Fotos (von bowe no unje): Daut niee Bok von Tatjana Klassner en Heinrich Siemens utem Tweeback-Verlag, Tina Wedel mett Mikro en mett Frind oppe Behn, dee Schlorre-Grupp biem Daunze, twee oole Frind biem Musizere, Hezhgrul Peeta Brun halpt ons dentje, daut wie Mensche send, Hannah Siemens schmenjt fresche Tweebak, woone Marina Jaunze noch vegone Nacht jebakt haud...

Dienstag, 16. Oktober 2007

Carlos Reygadas


Dis Mexa (ooda beta: Mexikauna?) es wertjlich een entressaunta en sondaboara Mensch: Kaun selwst tjeen Plautdietsch, oba moakt eenen Film opp Plautdietsch! En dan noch waut fe eenen!!!

Carlos Reygadas sien Kinofilm Stellet Licht haft nich bloos oppe Premiere en Cannes eenen Pries en seea goode Kritik jetjreaje. Uck opp veschiedne aundre internationale Film-Festivals es dit schmocke en stelle "mennische" Kunstwoatj aul jewese - en dee Zeitunge schreewe en schriewe Goodet en soogoa seea Goodet! Nu grods es dee Jury vom Filmfast en Chicago gaunz bejeistat, soo aus enne El Paso Times (opp spanisch) ooda enne Chicago Sun-Times (opp enjlisch) to lese es. Reygadas sien Stellet Licht tjricht doa nu grods dem Gold Hugo. (Von disem Tia hab etj verhea noch nuscht jehet, wan etj opprechtich sie...)

Endoont. Etj bliew jespaunt, auf ons Mexa daut noch bettem Stella Oska en Hollywood schauft - wensche wudd etj ahm (en ons!) daut!!!

Interwju mett Carlos Reygadas: Daut Foto bowe mok etj aum 22. Mei ditjoa en Cannes, kort verre Weltpremiere von Stellet Licht. Wan onse plautdietsche Lied interwjut worde, dan deede dee uck opp Plautdietsch rede, en etj haud dee feine Jeleajenheit daut opp Enjlisch to ewasate. Ooda omjedreit. Oba hopentlich nich vedreit...

Freitag, 12. Oktober 2007

To stell fe Hollywood?


Opp disem Bilt freie sich Tjnals Waul (Cornelio Wall, linjsch von mie) en Mika (Maria) Pankratz opp dee Premiere von Stellet Licht en Cannes aum 22. Mei 2007. Daut we een scheena Dach! En dee 24. Feebua 2008 woat vleicht uck een sonnja Dach, wiels: Dise Weatj haft daut Launt Mexiko dem Carlos Reygadas sien Kino-Woatj offiziell fe eene Oscar-Nominierung en Hollywood veajeschloage - enne Kategorie Basta framdsproakja Film.

Von vondoag aun es Stellet Licht enne Kinos en Mexiko to seene, boolt uck en aundre Lenda. Stellet Licht es dee eschta internationala plautdietscha Kinofilm. Dee enjlischa Titel es Silent Light, dee spaunscha Luz silenciosa. Doamett dee nich-plautdietsche Lied uck vestone, waut en disem Film jesajcht woat, rant unje em Bilt emma dee laundessproakja Tatjst mett.

Dit Foto (bowe) es von Hendritj (Heinrich) Siemens ut Bonn. Hee es dee nia President von Plautdietsch-Freunde e.V. en we em Mei 2007 uck en Cannes doabie. Meea opp Hochdietsch uck bie Stella Oska.

Samstag, 6. Oktober 2007

Dee Droom vom Zockaboom













* * *

To vel Koffe? To vel Tee?
Wea weet, daut woat vleicht uck een Droom
Jewese senne
Dee Klock, dee jeit nu aul opp dree
Etj schweet, etj dreem, mien
Oppjeweeldet Hoat
Daut puttat aus een Framda aune Dea
Wea weet, daut sie vleicht uck
Etj selwst! Etj schlop
Etj kom em Droom nohus no mie
Etj dreem Jeschichte utem ejnen Lewe
Dee noch niemols soo pessiet send
Dreem von Leew en Angst en Jefft en Torte
Dreem von Fiend en Frind en aula Sorte
Zockabeem!
Een Biet Broot mett Solt en Zipple
To vel Koffe? To vel Tee?
Wea weet, daut woat vleicht uck dee
Zockaboom jewese senne
Dee Zockaboom doa bute verre Dea
Jo, soone Beem, dee wosse aul en miene
Russlauntdietsche Dreem
En haude dee doa aundre Bleda
Soo pusd dee Wint doch meist soo grulich
Derche Asta
Wan et Nacht we
Rand wie fot
En sochte deep en onse Dreem
Wacholdabeem en funge emma bloos
Dee Notle
Wie watje opp mett Koppweedoag
Dit send aundre Siede
Aundre Bleda
Bute schniet et, Blott es aune Reda
Bute woat et wada dunkel
Bute! Benne oba schient dee Sonn
En schient to dach, to stell, to heet
Etj schweet, etj dreem, mien
Framdet Hoat ut Holt well nenn, well rut
Daut puttat aune Dea
Woon Droom, woon Boom
Opp woone Sied, opp woonem Blaut
Daut es nu aula derchenaunda
Etj bruck noch een bet Tiet
Sajcht eene Stemm
Schlop moa, schlop moa
Es doch aules haulf soo schlemm
Schlop en dreem, en lew dien Droom
Von janem Zockaboom

* * *

Dit Jedicht we aul mol em Novamba 2005 publizet - uck bie Plautdietsch-L. Bowe oppem Bilt es daut Cover vonne Numma 17 vonne Tietschreft Plautdietsch FRIND to seene...

Wea weet...











* * *

Wie stone jieda Dach opp
Wie habe daut emma soo drock
En daut, waut wie doone
Daut mott sich uck loone
Dee Welt saul doch seene
Daut Goode en Scheene
Bie ons!

Opp Oabeit schweet wie ons meed
Send pienich en emma reed
En daut, waut wie doone
Daut mott sich uck loone
Dee Boss saul doch seene
Daut Goode en Scheene
Bie ons!

Nomeddach kohm wie nohus
En Oabeit finj wie uck tus
En daut, waut wie doone
Daut mott sich uck loone
Dee Fru saul doch seene
Daut Goode en Scheene
Bie ons!

Aum Sindach go wie to Tjoatj
Wie spende fe een goodet Woatj
En daut, waut wie doone
Daut mott sich uck loone
Ons Gott saul doch seene
Daut Goode en Scheene
Bie ons!

En dan send wie uck mol oolt
Dee latste Stund tjemmt dan boolt
Wie tjene nuscht doone
Waut woat sich nu loone?
Es nu noch to seene
Daut Goode en Scheene
Bie ons?

Wea weet...

* * *

Tom eschten Mol publizet bie Plautdietsch-L, Oostre 2000 - see uck Ewasatinj opp Nadadietsch ("KEEN WEETT...", von Ron Hahn ut Seattle/USA)

Tom Bilt bowe: Jistre sach etj en Aachen dem Film Ratatouille. En disem schmocken Kinokomplex honge uck Filmposter fe Die Vorahnung mett Sandra Bullock. Etj mok een Foto vom Plakat...

Mittwoch, 3. Oktober 2007

Russlaunt, Dietschlaunt...


...en Weit, soo wiet aus dee Oge retje. Wie seie Leew en Stried en Edschocke, en wie tjriee uck emma wada, waut wie seie: Leew en Stried en Edschocke. Jieda Dach. Jieda Joa. Wie tjriee Tjinja, wie bue Hiesa, wie tratje von eenem Launt nom aundren. Onse Tjinja velote ons, wie velote onse Hiesa. Weit wausst emma wada, woo wie send, en woo wie nich send. Vleicht were dit onjefea dee Jedanke, woone mie derchem Kopp jinje, aus etj mol irjentwan enne latste 17 Joa dit Jedicht schreef:

Russlaunt, Dietschlaunt: Han en tridj
Haulf bedieselt sto wie opp
Bitt ons hia ne rusche Midj
Ritt ons doa een dietscha Kopp!

Wie trocke wajch ut janem Launt
Woo ons dee Schereschliepa lowde
Trock ons daut Hoat? Trock dee Vestaunt?
Fot von woo wie Edschocke vegrowde...

Opp emma oppe Sted to kloffe
Ne, daut es ons nich dee Sach!
Trurich, waut wie hia mol troffe
Naum sich dee Nacht, meist ewadach!

Soo tratj wie wieda, emma wada
Velote Nobasch, Hoff en Hus
Fe ons es dise Welt ne Lada:
Krup wie nohecht? Send wie boolt tus?